WhatsApp-ը ներկայացրել է նոր գործառույթներ
WhatsApp մեսենջերը հայտարարել է նոր գործառույթների թողարկման մասին: Դրանք հասանելի կլինեն ծրագրի նոր տարբերակներում առաջիկա մի քանի շաբաթների ընթացքում, հայտնում են ընկերությունից: Ծրագրավորողները ներկայացրել են հինգ ֆունկցիա, որոնց թվում է մութ ռեժիմը WhatsApp Web տարբերակում: Նաև կհայտնվեն անիմացիոն ստիկերների հավաքածուներ, որոնք պետք է հաղորդակցությունը դարձնեն «ավելի զվարճալի և արտահայտիչ»:
QR կոդերի օգնությամբ ավելի հարմար կլինի նոր կոնտակտներ ավելացնել: Այլևս անհրաժեշտ չէ ձեռքով մուտքագրել հեռախոսի համարը: Կարգավիճակի գործառույթը այժմ հասանելի կլինի KaiOS֊ի վրա հիմնված բջջային հեռախոսների օգտատերերին:
Թարմացվել են տեսազանգերը: WhatsApp-ի ծրագրավորողները մեծացրել են խմբային տեսազանգերի մասնակիցների հնարավոր թիվը մինչև ութ: Բացի այդ, այժմ հնարավոր կլինի ընդլայնել զրուցակիցներից մեկի տեսապատկերը ամբողջ էկրանով:
«Մենք շարունակում ենք կատարելագործել մեր արտադրանքի դիզայնը, որպեսզի WhatsApp-ը մնա շփման ամենահարմար ձևը, որտեղ էլ որ լինեք», – ասվում է ծրագրի կայքում:
