Ի՞նչ հետևանք կարող է թողնել կորոնավիրուսը ուղեղի վրա

Երկիր մոլորակի համար թարմեցնող էֆեկտ ունեցող ու մարդկանց ուսերին բեռ դարձած նոր տեսակի կորոնավիրուսը կամ, ինչպես այժմ սրան կոչում են պաշտոնապես, SARS-CoV-2-ը ( նախկինում՝ 2019-nCoV ) շարունակում է առանց դադարի տարածվել ու մարդկանց ստիպել դուրս գալ հարմարավետության գոտուց և շաբլոն վարքագծից ու հարմարվել նոր իրավիճակին։

Այս ֆոնին շարունակում են նվիրումով իրենց աշխատանքը կատարել նաև գիտնականները, որոնց աշխատանքը շատ դեպքերում մնում է կադրից դուրս, քանի որ դրա լուսաբանումը կարող է դիտումնաբեր չլինել։ Իսկ մենք կաշկանդված չենք վերջին նշած մտավախությունով ու այս անգամ Ձեզ ենք ներկայացնելու մասնագետների վերջին ձեռքբերումը. այն, թե COVID-19 կորոնավիրուսային ինֆեկցիոն հիվանդությունը ինչ ազդեցություն կարող է թողնել ուղեղի վրա։

Խոսքը, այսպես կոչված, սուր հեմոռագիկ նեկրոտիզացվող էնցեֆալոպաթիայի մասին է, որի ժամանակ վնասվում են ուղեղի հյուսվածքները, ու դիտվում է արյունազեղում ( արյունատար անոթներից դուրս հոսած արյան կուտակում ) և նեկրոզ ( բջիջների ու հյուսվածքների մահ )։ Ինչպես արդեն լսած կլինեք բազում անգամներ՝ COVID-19 հիվանդության խորացման ժամանակ առաջանում է վիրուսային թոքաբորբ, սակայն, թե դրա խորացումը ինչ հնարավոր հետևանքներ կարող է ունենալ նյարդաբանական առումով, դեռևս հայտնի չէր։

Ամերիկացի ռադիոլոգների վերջերս ներկայացրած տվյալները լույս են սփռել վերոնշված հարցում։ Այս պատմության կենտրոնում կանգնած է մի պացիենտ, ով դիմել է բժշկին սրտխառնոցի, ջերմության բարձրացման և վերջին 3 օրերի ընթացքում գիտակցական խառնաշփոթի գանգատներով։ Հոսպիտալացումից հետո վերջինիս մոտ հաստատվել է կորոնավիրուսի առկայությունը։ Հաշվի առնելով այն, որ պացիենտը դժգոհություններ ուներ նաև նյարդային համակարգի հետ կապված՝ բժիշկները մի շարք հետազոտություններ են իրականացրել ( այդ թվում՝ համակարգչային տոմոգրաֆիա (ՀՏ) և մագնիսառեզոնանսային տոմոգրաֆիա (ՄՌՏ) ), որոնցում ներգրավված էր ուղեղը։

Ըստ աղբյուրի՝ և՛ ՀՏ-ն, և՛ ՄՌՏ-ն ցույց են տվել, որ պացիենտի թալամուսները սիմետրիկորեն վնասված են։ Սրանից բացի, ՄՌՏ-ով հետազոտությունը երևան է հանել նաև այլ հատվածների վնասումներ։

Նշվում է նաև, որ բժիշկները հատուկ կոնտրաստային նյութի ներարկումից հետո նկատել են, որ վերջինս օղակաձև կուտակվում է որոշակի հատվածներում, որտեղ վնասված են եղել ուղեղային հյուսվածքներ, ինչպես նաև նկատվել են արյունազեղումներ։

Այստեղ հետաքրքրականն այն է, որ մի քանի պարբերություն վերևում նշված բարդ անվանումով ուղեղի հետ կապված սրացումը երբեմն առաջանում է վիրուսային հիվանդությունների արդյունքում, ու խնդիրը ոչ թե այն է, որ վիրուսն անցնում է ուղեղ, այլ, այսպես կոչված, արյունաուղեղային պատնեշի վնասումն է և իմունային համակարգի անկառավարելի հիպերակտիվացիան։

Ինչ վերաբերվում է արյունաուղեղային պատնեշին՝ ապա սա շատ լուրջ պաշտպանական նշանակություն ունի մեր կենտրոնական նյարդային համակարգի համար ու թույլ չի տալիս, որ արյունից որոշ « անթույլատրելի » նյութեր անցնեն ուղեղ, սակայն, երբ սա նորմալ չի գործում գլխուղեղը հայտնվում է լուրջ վտանգի տակ։ Ուղեղի գլխավոր վահաններից մեկի մասին կխոսենք առանձին նյութով։

Թերևս այսքանը, ու վերջում նշենք, որ նյութի գլխավոր հերոս-պացիենտի մոտ, կարծես թե, դեռևս ամեն ինչ կարգին է, ու նրա համար նշանակվել է համապատասխան բուժում ))

Եվ այս ընթանցքը կարող եք օգտագործել ինքնակրթվելով կիսատ թողածը սովորելով, ֆիլմեր դիտելով։

Նյութի աղբյուր՝ focus-space.blog