Ողջույն:  Այսօր  եկել  ենք ձեզ  ներկայացնելու  հարցազրույց  մի  շատ  կարևոր  ու  հետաքրքիր  նախաձեռնության  վերաբերյալ:  Մեր  հյուրերն են կազմակերպիչներ  և  կամավորներ Մարտին  Ղազարյանը,  Վիկտորիա Յեփրեմյանը և  Գայանե Հարությունյանը:

 – Մարտին  ջան, կասե՞ս՝ ինչ է իրենից ներկայացնում «Վայելիր երաժշտություն և աջակցիր երեխաներին» նախաձեռնությունը։

– Ծրագիրը բարեգործական  համերգների  շղթա  է,  որոնք  ուղիղ  եթերով  անցկացվում  են ֆեյսբուքյան  հարթակում: Միջոցառումների ընթացքում  մարդիկ հնարավորություն  ունեն անվճար  վայելելու առցանց համերգը և  աջակցելու մարզերի երեխաներին ինչպես  ֆինանսական  աջակցություն տրամադրելով,  այնպես  էլ  տեխնիկական սարքավորումներ  փոխանցելով:

 – Ինչպե՞ս ծնվեց գաղափարը։

– Անգլերենի հերթական  դասընթացներից  մեկի  ժամանակ, երբ  թեման  երաժշտությունն էր, երկու երեխա շատ լավ երգեցին: Քանի  որ այդ  ընթացքը  համընկնում էր կարանտինի  հետ,և  մենք  տեսնում էինք,  որ  մեր  ընկերներից շատերը  տեխնիկական միջոցների  աջակցության  կարիք  ունեին, մտածեցինք, որ կարող ենք բարեգործական համերգ կազմակերպել, որտեղ կերգեին մեր  ընկերները: Անմիջապես  հետո  մենք դիմեցինք Eworld Kids-ին, ինչից  հետո պլանները փոխվեցին. արդեն պետք է համերգով հանդես գային հայտնի երգիչները:

 – Վիկտորիա ջան, ի՞նչ աշխատանքներ եք տարել այս ընթացքում և ո՞րն էր ամենադժվարը։

– Ոչինչ հեշտ  չի եղել, բայց հեշտացել է թիմային աշխատանքի և ըկերական մթնոլորտի շնորհիվ: Դժվար էր 10 օրում կազմակերպել օնլայն համերգ, որը կլիներ  լավ երաժիշտների մասնակցությամբ և  բարձր որակով: Համերգի ընթացքում տարվող բոլոր աշխատանքները բավականին բարդ էին և  ծավալուն, էլ ավելի էր բարդանում սեղմ ժամկետների պատճառով: Սակայն թիմակիցների  բարձր  պրոֆեսիոնալիզմի արդյունքում կարողացանք  հասնել  մեր  ուզած  սանդղակին:

 – Ի՞նչ ակնկալիքներ ունեք նախաձեռնությունից և մարդկանցից։

– Այս պահին ունենք 100-ից ավելի երեխա ունենք, ովքեր սպասում են մեր աջակցությանը։ Հուսով ենք՝ մարդկանց հնարավորինս մեծ քանակ կներգրավվի աջակցության գործում։

 – 2 օր  առաջ եղավ առաջին համերգը, այ ինչպիսի՞ տպավորություններ ունեցաք։

– Առաջին համերգի հետ կախված նշեմ, որ բավականին հարթ ընթացք ունեցավ՝ անկախ ընթացիկ խոչընդոտներից։

Մենք դիտարկել էինք ընթացիկ բոլոր ռիսկերը, և չնայած նրան, որ դրանց 90%-ը իրականացավ, բայց թիմակիցների բարձր որակի աշխատանքի շնորհիվ կարողացանք արագ շտկել։

 – Ի՞նչ տրամադրությամբ եք մոտենում այսօրվա և վաղվա համերգներին։

– Թիմային աշխատանքի, միմյանց վստահելու և ընկերական ջերմ մթնոլորտի շնորհիվ համոզված  ենք, որ լավագույնս կկարողանանք ներկայացնել նաև մյուս ծրագրերը։ Հուսով ենք՝ մեզ դիտողները ակտիվ կտարածեն և կաջակցեն մարզաբնակ երեխաներին։

 – Ի՞նչ են իրենցից ներկայացնում «Մարզերի երեխաները մարզերում» և «Eworld Kids» նախագծերը։

– «Մարզերի երեխաները մարզերում»-ը պրոյեկտ է, որը միտված է մարզաբնակ երեխաներին ադապտացվելու այլ երեխաների հետ և օգնելու էլ ավելի համաքայլ ընթանալ 21-րդ դարին: (Գայանե)

– Իսկ Eworld Kids-ը նախաձեռնություն է, որը տարբեր երկարաժամկետ և կարճաժամկետ ծրագրերի միջոցով կարողանում  է նպաստել երեխաների աշխարհայացքի ընդլայնմանը, ճկուն մտածելակերպի զարգացմանը,ինչպես նաև նոր գիտելիքներ փոխանցելուն։ Հուսով ենք՝ մարդիկ կվայելեն ճաշակով երաժշտություն և իրենց ուժերի ներածին չափով կաջակցեն երեխաներին։

 – Ի՞նչ կոչ ունեք մարդկանց։

– Կոչ չասենք, ուղղակի ցանկանում ենք, որ մարդիկ իրենց գնահատանքը ցույց տան այս նախագծի նկատմամբ, ով ինչպես կարող է։ Շատ հետաքրքիր է, որ նույնիսկ 16-17 տարեկան պատանիներ են ցանկանում աջակցել իրենց հասակակիցներին և դրանով վարակել ուրիշներին։ (Վիկտորիա)

 – Շնորհակալություն նման  հրաշք  նախաձեռնություն  ստեղծելու  և   մեր հարցերին  պատասխանելու  համար:

– Ձեզ  ևս շնորհակալություն:

Հիշեցնենք,  որ «Վայելիր  երաժշտություն և  աջակցիր  երեխաներին» ծրագրի  շրջանակներում  դուք  կարող  եք վայելել  համերգը  և  կատարել  նվիրատվություններ: Ծրագրին և  հաշվեհամարներին կարող  եք  ծանոթանալ այստեղ , իսկ  համերգներին,  որոնք  անցկացվելու  են  այսօր  և  վաղը  ժամը  20:30-ից  սկսած  կարող  եք  հետևել Eworld Kids-ի  ֆեյսբուքյան  էջում: