Ինչու՞ Դոնալդ Թրամփը վերջապես որոշեց դիմակ կրել
ԱՄՆ նախագահ Դոնալդ Թրամփը կորոնավիրուսային պանդեմիայի սկսվելուց հետո առաջին անգամ դիմակ է կրել հասարակության մեջ:
Նախագահը այցելել էր Վաշինգտոնի սահմաններից դուրս գտնվող Վալտեր Ռիդի զինվորական հոսպիտալ, որտեղ նա հանդիպել էր վիրավոր զինվորների և բուժաշխատողների հետ:
Սպիտակ տնից դուրս գալիս Թրամփն ասել էր.
«Ես երբեք դեմ չեմ եղել դիմակ կրելուն, բայց կարծում եմ, որ դրանք կրելու համար կա համապատասխան տեղ և ժամանակ»:
Նշենք, որ որոշ ժամանակ առաջ նա ծաղրել էր իր մրցակից Բայդենին դիմակ կրելու համար և շեշտել էր, որ ինքը դիմակ չի կրի:
Բայց շաբաթ օրը նա ասել է. «Կարծում եմ, երբ գտնվում ես հիվանդանոցում, հատկապես այդպիսի հատուկ վայրում, որտեղ շփվում ես շատ զինվորների և մարդկանց հետ, ովքեր, որոշ դեպքերում, պարզապես նոր են վիրահատվել, նախընտրելի է դիմակ կրելը»:
Լրատվամիջոցները Թրամփի տեսակետի փոփոխությունը կապում են, ԱՄՆ-ում շաբաթ օրը կորոնավիրուսով վարակվածների թվի հետ: Մեկ օրում գրանցվել է նոր ռեկորդային 66.528 դեպք:
