Ու՞մ նվիրել ծաղիկներ
Ծաղիկ նվիրելու վերաբերյալ մեր օրերում քարացած կանոններ չկան, սակայն կարելի է հետևել որոշ հանձնարարականների:
Ծաղիկներ կարելի է նվիրել բոլորին՝ որևէ առիթով և առանց հատուկ առիթի:
Կանանց
Փոքրիկ քրոջը կամ ընկերուհուն կարելի է նվիրել կիսաբացված ու բաց երանգներով ծաղիկներ՝ վարդագույն, դեղին, որոնք խորհրդանշում են երիտասարդությունը, քնքշությունն ու արևի լույսը:
Տարիքով կնոջը պետք է վառ գույնի ու լրիվ բացված ծաղիկներից ծաղկեփունջ մատուցել: Որքան մեծ է կնոջ տարիքը, ծաղիկների գույներն այնքան ավելի հագեցած պետք է լինեն:
Տարեց մարդկանց մի’ նվիրեք փողաշուշաններ (կալա), քրիզանթեմներ, սպիտակ ու դեղին գույների ծաղիկներ. դրանք թախիծ ու բաժանում են խորհրդանշում:
Տղամարդկանց
Ուժեղ սեռի ներկայացուցիչներին ծաղիկներ ու ծաղկազամբյուղներ են նվիրում հոբելյանի, մրցանակ ստանալու, պարգևատրման կապակցությամբ: «Տղամարդկային» ծաղիկներ են թրաշուշանները, մեխակները, գեորգինները, երկար ցողուններով կարմիր վարդերը: Ծաղկեփունջը պետք է խիստ ու ներկայանալի լինի, առանց ավելորդությունների:
Արդեն տարիքն առած կամ պահպանողական հայացքների տեր տղամարդկանց ցանկալի է միագույն ծաղկեփունջ նվիրել:
Տիրական, ծանրակշիռ տղամարդուն հարմար են երկար ցողուններ ունեցող ծաղիկներով ծաղկեփնջերը:
Երիտասարդ, եռանդուն տղամարդուն կարելի է խոտաբույսերով ու ճյուղերով էկզոտիկ կոմպոզիցիա նվիրել:
Երեխաներին
Մանկական փնջերն ու կոմպոզիցիաները պետք է կազմված լինեն նուրբ երանգներ ունեցող բաց գույնի ծաղիկներից, հատկանշվեն տոնական շնչով և անակնկալի տարրերով: Օրինակ՝ ծաղիկներին կարելի է համադրել գունավոր թղթերից կամ ժապավեններից պատրաստված թիթեռնիկներ, փափուկ խաղալիքներ: Փոքրիկը կուրախանա նաև ծաղկեփնջի մեջ շոկոլադ կամ փոքրիկ նվեր «հայտնաբերելով»:
Երիտասարդ մայրիկներին
Երիտասարդ մայրիկին կարելի է երկու ծաղկեփունջ նվիրել՝ մեծ և փոքր: Կարծիք կա, որ ծաղկեփունջը հաջողություն է բերում նորածնին: Աղջիկ նորածիններին վարդագույն կամ կարմիր ծաղիկներ են նվիրում, իսկ տղա նորածիններին՝ կապույտ կամ մանուշակագույն:
