«Հույսի մարաթոնի» միակ մասնակիցը՝ Թերի Ֆոքս
Ս ա շատ հուզիչ և մոտիվացնող պատմություն է: Լուսանկարում արյունոտ մարզահագուստով վազող երիտասարդը Թերի Ֆոքսն է՝ 1980 թվականի հուլիսին Կանադայի տարածքում անցկացված «Հույսի մարաթոնի» միակ մասնակիցը։ Նա վազեց 146 օր, մինչև որ մահը վրա հասավ։
Թերին ծնվել է Կանադայում, 1958 թվականին։ Նա խոստումնալից մարզական կարիերա ուներ, երբ 22 տարեկան հասակում, 1977 թվականին Թերին սկսեց ցավ զգալ աջ ծնկում և նրա մոտ շուտով ոսկորների քաղցկեղ ախտորոշվեց։ Բժիշկները ստիպված են եղել անդամահատել նրա աջ ոտքը։ Երեք տարի անց երիտասարդ մարզիկը որոշում է կայացնում վազքով անցնել ողջ Կանադան՝ օվկիանոսից օվկիանոս։
Վազքի նպատակը քաղցկեղն ուսումնասիրելու համար նվիրատվություններ հավաքելն էր։ «Հույսի մարաթոնի» մեկնարկին նա երազում էր, որ ամեն մի կանադացի մեկ դոլար նվիրաբերի։ Մեկ տարուց ավել նա ամեն օր մարզվում էր, որովհետև լավ էր հասկանում՝ նույնիսկ ֆիզիկապես լիարժեք մարդու համար է դժվար նման վազքուղին հաղթահարել՝ առանց նախնական պատրաստվածության։
Թերի Ֆոքսը «Հույսի մարաթոնը» սկսեց 1980 թվականի ապրիլի 12-ին՝ ոտքը Ատլանտյան օվկիանոսում թրջելուց հետո։ Նա նպատակ ուներ մեկ անգամ էլ մարաթոնի ավարտին ոտքը թրջել արդեն Վանկուվերում՝ Ատլանտյան օվկիանոսի ջրերի մեջ։ Նա օրվա մեջ միջինում վազում էր 42 կմ, իսկ հիվանդությունն այդ ժամանակ զարգանում էր։ Թերին անտանելի ցավեր ուներ ոտքի պրոթեզի պատճառով, բայց հզոր կամքի ուժն ու միլիոնավոր բախտակիցներին օգնելու ցանկությունը նրան առաջ էին տանում։
Թերին չկարողացավ ավարտել մարաթոնը։ Քաղցկեղը տարածվել էր թոքերում, և Թերին ստիպված ընդհատեց մարաթոնը 1980 թվականի սեպտեմբերի 1-ին։ Նա կանգ առավ Տանդեր-Բեյ քաղաքի մոտ՝ 143 օր անդադար քայլից հետո, անցնելով 5 373 կմ տարածություն։ 10 ամիս հետո, չբոլորելով 23-ամյակը, Թերին ավանդեց հոգին։
Թերիի հիմնադրամում 1981 թվականի փետրվարին արդեն հավաքագրվել էր մոտ 24 միլիոն դոլար, բայց ամենակարևորը, Թերիին հաջողվեց թեմայի վրա սևեռել հանրության լայն զանգվածների ուշադրությունը։ Այժմ Կանադայում և աշխարհի ավելի քան 50 երկրներում Թերի Ֆոքսի անվան ամենամյա բարեգործական մարաթոններ են անցկացվում, որոնց ընթացքում հավաքագրված գումարները փոխանցվում են Թերի Ֆոքսի անվան քաղցկեղի ուսումնասիրության հիմնադրամին։
Terry Fox Run-ը գրանցված է աշխարհի ռեկորդների ցանկում, որպես մեկ մարդու կողմից իրականացված ամենամեծ ակցիա։ Այժմ, Թերիի մահից 39 տարի անց, «Թերի Ֆոքսի հիմնադրամի» կարողությունը կազմում է 360 միլիոն դոլար, իսկ դա նշանակում է, որ Թերիի ջանքերն ապարդյուն չեն անցել։
Կանադայում Թերիի անունով ստորջրյա նավ կա։ Այն ազատ ջրեր է բաց թողնվել 1983 թվականին։ Աշխարհում և Կանադայի տարբեր քաղաքներում Թերի Ֆոքսի հիշատակը հավերաժացնող արձանների թիվն անցնում է մի քանի տասնյակը։
