Վճարումների ապագան
Իր գոյության ողջ ընթացքում մարդկությունը ձգտել է ավելի հարմարավետ կյանքի: Տեխնոլոգիական առաջընթացի հետևանքով ֆինանսական գործարքները ևս ենթարկվել են փոփոխությունների՝ հարմարվելով մարդկության օրեցօր աճող պահանջմունքներին: Վերջին տարիներին նկատվում է անցում վճարման կանխիկ տարբերակից անկանխիկ եղանակների: Վճարման անկանխիկ եղանակները հարմարավետությանը ու ժամանակի խնայմանը զուգահեռ կարող են նաև որոշակի ռիսկեր պարունակել՝ կապված կիբեռանվտանգության և տարեցների հարմարվողականության հետ:
Հեռու չէ այն օրը, երբ ֆիզիկական դրամապանակների կարիքն այլևս չենք ունենա: Առանձնացրել ենք անկանխիկ վճարումների առավել տարածված մի քանի տարբերակներ.
- Բանկային բջջային վճարումներ. վերջին տարիներին լայնորեն տարածվել են մոբայլ և ինտերնետ բանկինգ համակարգերը՝ որպես հեռահար բանկային սպասարկման համակարգեր: Դրանք հնարավորություն են տալիս բանկի հաճախորդներին աշխարհի ցանկացած վայրից, որտեղ կա ինտերնետ հասանելիություն, 24/7 ռեժիմով ղեկավարել իրենց բանկային հաշիվները և օգտվել այլ ծառայություններից:
- Բջջային դրամապանակներ (ApplePay, GooglePay և այլն). սմարթֆոնի օգտատերը բջջային դրամապանակը կցում է իր բանկային քարտին և կատարում վճարումներ: Հայաստանում առաջին նման դրամապանակը գործարկեց IDram վճարային համակարգը 2012 թ.-ին:
- Էլ-դրամապանակներ (Qiwi, Mobikwik և այլն). այս դրամապանակներով վճարում կատարելու համար օգտատերը նախօրոք իր դրամապանակի հաշվին գումար է փոխանցում:
- Անլար փոխանցման տեխնոլոգիա (NFC). տարածված են ApplePay և GooglePay ծառայությունները, որոնք գործում են iOS և Android օպերացիոն համակարգերի վրա: Հատուկ բջջային հավելվածում անհրաժեշտ է անձնական հաշվին կցել բանկային քարտը, իսկ վճարումը կատարելու համար հեռախոսը մոտեցնել համապատասխան սարքավորմանը:
Այս եղանակները, որոնք 1 դար առաջ պատկերացնել հնարավոր չէր, ապագայում ավելի կկատարելագործվեն՝ կիրառվելով հասարակության ավելի լայն շերտերի կողմից:
