Տաուսե Մալակի և յոթ հրեշտակների տաճարը
Տաուսե Մալակը եզդիական կրոնում ամենամեծ հրեշտակն է, բոլոր հրեշտակների գլխավորը` սիրամարգի տեսքով։ Միշտ նրան շրջապատում են տարբեր առաքելություն ունեցող հրեշտակներ։ Եվ ահա այս հավատալիքային մոտեցումը մղել է գործարար եւ բարերար Միրզա Սլոյանին նախաձեռնել Տաուսե Մալակի տաճարի կառուցումը։
Տաուսե Մալակի և յոթ հրեշտակների տաճարը գտնվում է Արմավիրի մարզի Ակնալիճ գյուղում։ Հայտնի է նաև Ակնալիճի եզդիական տաճար։
Բացման հանդիսավոր արարողությունը տեղի է ունեցել 2019 թվականի սեպտեմբերի 29-ին, որին ներկա էին բազմաթիվ եզդիներ, Հայաստանի պետական կառույցների ներկայացուցիչներ, համայն աշխարհի եզդիների հոգևոր առաջնորդ Միր Թասիմ Բեկը։
Սեպտեմբերի 29-ը հոգևոր առաջնորդի կողմից հռչակվեց ուխտագնացության օր։
Համաձայն Հայաստանում եզդիների հոգևոր առաջնորդի Հասան Հասանյանի Ակնալիճի տաճարը նախկին ԽՍՀՄ տարածքում առաջին եզդիական սրբատեղին է։
2015 թվականի ապրիլի 22-ին համայն աշխարհի եզդիների հոգևոր առաջնորդ, նորին սուրբ մեծություն Միրա Միրե Թահսին բեգի գլխավորությամբ տեղի ունեցավ տաճարի հիմնարկեքը։
Եվ ահա 3,5 տարի անց մարմարակերտ տաճարը վեր է խոյացել Մասիսների հայացքների ներքո։ «Ուրախ եմ, որ ոչ միայն իմ, այլև համայն աշխարհի եզդիների երազանքն է իրականություն դարձել,-ասում է Միրզա Սլոյանը, – պատահական չէ, որ այն հայկական հողում է: Չէ՞ որ այն երկրորդ հայրենիք է դարձել տասնյակ հազարավոր եզդիների համար»։
Ինքնատիպ մարմարակերտ կառույց է Տաուսե Մալակի տաճարը։ Տաճարի բարձրութունը 29 մետր է։ Տաճարը ունի մեկ մեծ և յոթ փոքր գմբեթներ, որոնք սկսվում են 8 մետր բարձրությունից։
Մեծ գմբեթը բարձրանում է ևս 7 մետր ուղղագիծ, այնուհետև ևս 11,60 մետր թեք ճառագայթների տեսքով։ Այս ամենին ավելանում է ոսկեզօծ արևը, որի բարձրությունը 2,20 մետր է։ Մեծ գմբեթի արևի ճառագայթների թիվը 24 է, իսկ պատուհանների թիվը՝ 8։ Փոքր գմբեթների թիվը 7 է՝ մեկական պատուհանով։ Յուրաքանչյուրի բարձրությունը 14,65 է՝ գումարած 1,30 մ ոսկեզօծ արևը։ Արև կա և տաճարի մուտքային մասում՝ 3,20 մ տրամագծով։ Տաճարը ևս երկու մուտք ունի՝ հյուսիսային և հարավային հատվածից, լայնությունը 18 մետր է, երկարությունը` 21։
«Մենք պետություն չունենք ու լինելով խոցելի փոքրամասնություն, մենք անխուսափելիորեն կասիմիլացվենք, եթե չպաշտպանենք մեր ավանդույթները»,- նշում է Հայաստանի եզդիների հոգևոր առաջնորդ Հասան Հասանյանը։
Նա հույս է հայտնում, որ նոր տաճարը «կդառնա հոգևոր կյանքի խոշորագույն կենտրոն ամբողջ աշխարհի եզդի ուխտագնացների համար»։
Լուսանկարները՝ Սուրեն Մանվելյանի։
