Իրավիճակային մարքեթինգ
Իրավիճակային մարքեթինգը բրենդի արձագանքն է իր լսարանի համար կարևոր որևէ իրադարձությանը: Բնականաբար այն ուղղված է առաջարկվող ապրանքի կամ ծառայության վրա ուշադրություն հրավիրելուն և հետևաբար այն վաճառելուն: Իրավիճակային մարքեթինգ կարող է իրականացվել ինչպես նախօրոք պլանավորված մարքեթինգային ծրագրի հիման վրա (օրինակ՝ տոն օրերին), այնպես էլ չպլանավորված, պատահական իրադարձությունների հետևանքով:
Իրավիճակային մարքեթինգի սկիզբ է համարվում Oreo ընկերության թվիթը, որը մասնագետների շրջանում հայտնի է Oreo blackout tweet անունով: 2003 թ.-ի փետրվարի 4-ին ԱՄՆ-ում Ֆուտբոլի ազգային առաջնության ժամանակ ստադիոնի մի մասում լույսերը անջատվեցին և խաղը դադարեցվեց: Տրիբունաներում ներկաների ուշադրությունը սևեռվեց սոցիալական ցանցերի վրա, որտեղ այս իրադարձությունը ակտիվ կերպով քննարկում էին: Այդ ժամանակ հենց Oreo-ի SMM մասնագետները մտածեցին և հրապարակեցին կրեատիվ թվիթ՝ ուշադրություն սևեռելով իրենց ապրանքանիշի վրա, այն է՝ «Դուք դեռ կարող եք թաթախել (Oreo-ն) մթության մեջ»:
Լավ իրավիճակային մարքեթինգը այն է, երբ՝
- իրադրության իմիջը դրական ազդեցություն է ունեում ապրանքի կամ ծառայության իմիջի վրա,
- բացի տեղեկատվությունից փոխանցվում են նաև հույզեր,
- ապահովված են իրավիճակային հաղորդակցության պարզությունն ու հստակությունը,
- իրադրության լսարանը և տվյալ ապրանքի կամ ծառայության շուկայական լսարանը համընկնում են,
- մարքեթինգային գործողությունները ճիշտ ժամանակին են կատարվում, այսինքն կա օպերատիվ արձագանք իրադարձությանը:
Սովորաբար խորհուրդ է տրվում իրավիճակային մարքեթինգում առավելագույնս խուսափել կրոնական կամ քաղաքական հարցերից, քանի որ դրանք ոչ միանշանակ և շատ դեպքերում անկանխատեսելի ազդեցություն կարող են ունենալ մարքեթինգային օբյեկտի լսարանի վրա: Կարևոր է, որ այն չհակասի ընկերության որդեգրած մարքեթինգային քաղաքականությանը, նպատակներին ու սկզբունքներին:
