SHA հագուստի բրենդը ստեղծվել է 2020թ․-ին։ Երիտասարդ դիզայներները բրենդի ստեղծման հիմքում դրել են նորարարությունն ու կոնցեպտուալությունը, արվեստի ազատության համար պայքարը։

Անցնող շաբաթ տեղի ունեցան SHA բրենդի դեբյուտային հավաքածուի նկարահանումները, որը վերածվեց մեծ սկանդալի: Մարդիկ լուսանկարել էին հավաքածուի մանրամասները և աղճատելով իրականությունը՝ տեղադրել էին այդ լուսանկարները համացանցում, որտեղ արդեն զայրացած ամբոխները ցուցադրեցին իրենց բառապաշարում տեղ գտած ամենաանվայել արտահայտությունները, սպառնալիքները, ներկայիս իշխանությունների մանկլավիկ լինելու, սեռական փոքրամասնությունների քարոզչություն անելու և այլ` մեզ համար անհասկանալի գործունեություններ ծավալելու մեջ։

Ինչպես նաև ապատեղեկատվության արդյունքում նկարահանումներին մասնակցած մոդելների անվտանգությունն այս պահին վտանգված է՝ չնայած նրան, որ մոդելները եղել են վարձու աշխատակիցներ, կատարել են իրենց աշխատանքը բարձր պրոֆեսիոնալությամբ:

Դրան նպաստեց անցորդներից մեկի` բեքսթեյջից արված լուսանկարը, որում մոդել տղամարդիկ պատկերված են վեր ծալած տաբատներով եւ շորտերով, ինչը վերագրվեց որպես նույնասեռականութան քարոզ: SHA բրենդը, որի համար էլ արվել է նկարահանումը, հերքում է նման խոսակցությունները` դրանք վերագրելով, որպես զրպարտություն եւ հավելելով, որ գովազդային արշավն արվել է բացառապես կոմերցիոն նպատակով.

Այս մասին խոսեցինք SHA բրենդի հիմնադիրներից մեկի հետ․

«Դա կոմերցոն նկարահանում էր: Ամեն ինչ շատ պրոֆեսոնալ մակարդակով է եղել` տեսախցիկներ, լույս եւ այլն: Նկարահանումը որոշեցինք իրականացնել Սարյան փողոցում, որովհետեւ տեղանքի առումով ավելի հարմար էր: Ըստ սցենարի` տղաներից երկուսը պետք է փոքր-ինչ ծալեին տաբատը, ու այդ պահին ինչ-որ մեկը, փաստորեն, կողքից մեզ նկարել է` թյուր կարծիք ստեղծելով համացանցում, որից հետո արդեն տարատեսակ նյութեր ու մեկնաբանություններ ենք տեսնում լուսանկարի ներքո: Լուսանկարն անհիմն կերպով քաղաքականացրին, նշեցին, թե դրանում տրանսգենդերներ են պատկերված, բայց նրանք, պարզապես, մոդելներ են, որոնք աշխատում էին կոմերցիոն նկարահանման շրջանակում: Նրանց կերպարները նկարահանման համար էին` իրականում շատ թրենդային կադրեր ենք ունեցել, որոնք երեւում են արդեն պատրաստի աշխատանքներում: Մինչդեռ ոմանք, առանց ճշտելու ինֆորմացիան, տարածել էին, թե սա նույնասեռականների շքերթ է, ինչը վստահեցնում ենք` զրպարտություն է: Նույնիսկ, իրավաբանորեն ճիշտ չէ մարդուն կողքից նկարելն ու զրպարտելը: Տղաներն էլ են այդպիսի գրառումների պատճառով շատ խնդիրներ ունեցել շրջապատում եւ տանը: Մարդիկ, պարզապես, ծալած տաբատներով էին, որտե՞ղ էին տեսել տրանսգենդերների: Բրենդը չի հանդիսանում սեռական, քաղաքական, կրոնական կամ այլ հայացքների քարոզչության միջոց։ Մեր գործունեությունը միտված է միայն ու միայն Հայաստանում՝ արվեստի զարգացմանը եւ նորարարությունների ստեղծմանը։ Հպարտորեն հայտարարում ենք, որ չենք պատրաստվում նահանջել կամ ընկճվել նմանօրինակ սկանդալների պատճառով, մենք հավատարիմ ենք մեր գործին, արվեստին և մեր որդեգրած արժեքներին»։