Փոխվել է մարդու մարմնի նորմալ ջերմաստիճանը

Բոլորիս էլ հայտնի է, այսպես կոչված, տաքություն արտահայտությունը։ Այն մենք կիրառում ենք, երբ ցանկանում ենք նկարագրել մարմնի ջերմաստիճանը։ Ընդունված է համարել, որ երբ այն կազմում է 37 °С, կամ մի փոքր ցածր, ապա ամեն ինչ կարգին է, իսկ երբ թիվն անցնում է 37-ից, ապա մենք ունենք « տաքություն »։

37 թիվը, որպես մարմնի նորմալ ջերմաստիճան, ընդունված է շատ վաղուց։ Դեռ 1851 թվականին բժիշկ Կառլ Վունդերլիխը տվեց մարդու մարմնի նորմալ ջերմաստիճանի սահմանը․ այն սկսվում է 36,2-ից ու ավարտվում 37,5 °C-ում։ Սակայն, կարծես, այս ցուցանիշներն արդեն « ծերացել » են․․․ Հարվարդի համալսարանի բժշկական ֆակուլտետի գիտնականների ուսումնասիրությունը հետաքրքիր փաստեր է ի հայտ բերել։

Քանի որ նորմալ համարվող ջերմաստիճանի պատկերացումները գալիս են 1850-ականներից, համեմատության համար գիտնականները ետ են գնացել մինչև նշված թվականները։ Բժիշկ Ջուլի Պերսոնետն ու կոլեգաները ուսումնասիրության համար օգտվել են Քաղաքացիական պատերազմի վետերանների բժշկական գրառումներից ( 1860-1930 թթ․ ), Առողջության և սնվելու ազգային առաջին հետազոտության ( 1971-1975 թթ․ ) և Ստենֆորդի համալսարանի բժշկական կենտրոնի ( 2007-2017 թթ․ ) տվյալներից։ Արդյունքում՝ ուսումնասիրման են ենթարկվել մարդու մարմնի ջերմաստիճանի 677 423 օրինակ, որոնք բոլորը ստացվել են ԱՄՆ-ում բնակվող մարդկանցից։

Վիճակագրությունների մշակումից հետո տեսականորեն հաստատվել է այն տեսակետը, որ մարդու մարմնի նորմալ ջերմաստիճանը ունի նվազման տենդենց։ Հաշվարկները ցույց են տվել, որ 157 տարվա ընթացքում 37 թիվը տասնամյակը մեկ 0,03 °C-ով նվազել է։

 

Ելնելով գիտնականների ստացած արդյունքից` կարող ենք եզրահանգել, որ այս պահին ԱՄՆ-ում բնակվողների մարմնի միջին նորմալ ջերմաստիճանը հասել է մոտ 36,55-ի։

Հետազոտության հեղինակները սա հիմնականում կապում են մարդու օրգանիզմում նյութափոխանակության գործընթացի ակտիվության անկման հետ։ Ինչպես նշվում է ուսումնասիրության վերաբերյալ հրապարակման մեջ՝ նյութափոխանակության կողմնակի էֆեկտը ջերմությունն է, որը ստացվում է էներգիայի ծախսի ընթացքում․ բնական է՝ որքան ակտիվ է նյութափոխանակությունը, այնքան շատ է ծախսվում էներգիա։ Իսկ անցյալում, երբ բավական տարածված էին քրոնիկ ինֆեկցիաները, ինչպիսին է, օրինակ՝ սիֆիլիսը, ակտիվ էր նաև օրգանիզմը։ Բայց ժամանակի ընթացքում առողջապահական ու գիտատեխնիկական առաջընթացի շնորհիվ իջել է քրոնիկ ինֆեկցիաների տարածվածության մակարդակը, որի արդյունքում համեմատաբար ավելի « հանգիստ » է նաև օրգանիզմը։ Սրա շնորհիվ երկարել է կյանքի միջին տևողությունը, քանի որ, ինչպես հայտնի է, բարձր ակտիվությամբ նյութափոխանակությունը հանգեցնում է ավելի կարճ կյանքի։

Ուսումնասիրության մասին ամբողջական ինֆորմացիան հրապարակվել է eLife ամսագրում՝ 2020 թվականի հունվարի 7-ին ))

 

Աղբյուր՝ focus-space.blog