Օգոստոսի 4-ին Լիբանանի մայրաքաղաք Բեյրութում հնչել է կրակոց, 5 րոպե անց սև ու սպիտակ, ապա արդեն կարմիր ծխի սյունը պատել է երկինքը. ցավալի պայթյուն գրանցվեց:

Նախնական և պաշտոնական վարկածով 6 տարի շարունակ ամոնիումի նիտրատի հազարավոր տոննաների ոչ անվտանգ ձևով պահեստավորման հետևանքով զանգվածը պայթել է` առաջացնելով այնքան ուժգին ցնցում, որ անգամ հարյուրավոր կլիոմետրեր հեռու` Կիպրոսում, զգացել են պայթյունի ուժգնությունը:

Այս աղետը ունեցավ հսկայական հետևանքներ: Քաղաքը հոսանքազրկվել է, ոչնչի են վերածվել տարածքի շինությունների մեծ մասը, տուժել է նաև Լիբանանում Հայաստանի դեսպանատունը: Սակայն ամենացավալին մարդկային կորուստներն են. օգոստոսի 5-ի առավոտվա դրությամբ աղետի հետևանքով մահացել է ավելի քան հարյուր մարդ, որոնցից 5-ը` հայ, հազարավոր մարդիկ էլ վիրավորվել են ու պայքարում են ապրելու համար:

Պայթյունից հետո Բեյրութի իշխանությունները մայրաքաղաքը հայտարարեցին տարերային գոտի: Ապա նաև հայտնեցին, որ 5 օրվա ընթացքում կավարտեն պայթյունի հետաքննությունը: Միաժամանակ նաև Լիբանանի ղեկավարությունը խնդրել է տարբեր երկրներից օգնություն: Խնդրանքն ընդունել են Ֆրանսիան, ԱՄՆ-ն և այլ երկրներ:

Վլադիմիր Պուտինը կիսել է լիբանանյան ժողովրդի վիշտը` ցավակցելով նրանց, իսկ Դոնալդ Թրամփն էլ ասաց, որ տեղի ունեցածը ոչ թե պայթյուն էր, այլ հարձակում: Ավելի ուշ ԱՄՆ ՊՆ-ում հայտարարեցին, որ Բեյրութի պայթյունի` հարձակում լինելու նշաններ չկան:

«Սգում ենք բոլոր զոհերի մահը եւ ցավակցում ենք բոլոր զոհերի հարազատներին եւ մտերիմներին։ Կանգնած ենք եղբայրական Լիբանանի կողքին» – Նիկոլ Փաշինյանի ցավակցական խոսքերն են ուղղված Լիբանանին: Վարչապետը ցավակցական ուղերձը հղել է Մեծի տանն Կիլիկիո կաթողիկոս Արամ Ա-ի հետ հեռախոսազրույցի և իր ֆեյսբուքյան էջի միջոցով:

Իրենց ցավակցկան ուղերձներն են հղել նաև Տիգրան Ավինյանը, Արմեն Սարգսյանը, Արարատ Միրզոյանը, Գագիկ ծառուկյանը և այլ գործիչներ:

Մեր կայքի ողջ աշխատակազմը ևս միանում է  ցավակցական ուղերձներին և հույս հայտնում, որ աղետի հետևանքները հնարավոր կլինի պակասեցնել ու մարդկային կորուստները կհասցվեն նվազագույնի: