Նորույթներ 2020. սերիալներ, որոնք արժե դիտել (մաս երկրորդ)
Շարունակում ենք ձեզ ծանոթացնել 2020 թվականի նոր սերիալների հետ, որոնց անհրաժեշտ է ուշադրություն դարձնել: Եթե առաջին մասը բաց եք թողել, կարող եք ծանոթանալ այստեղ։
«5-րդ ավենյու»
HBO մալուխային ալիքը որոշել է մեզ նվիրել կատակերգության եւ գիտական ֆանտաստիկայի խոշոր բյուջեով նախագիծ: Գլխավոր դերը կատարելու համար հրավիրել են սերիալային հումորի արքա Հյու Լորիին: Սերիալը ներկայացնում է 2060 թվականի իրադարձությունները: Տիեզերական զբոսաշրջությունը ծաղկում է եւ ամենահանրաճանաչ ուղղություններից մեկն է դարձել մեր Արեգակնային համակարգը: Կյանքում շատ բան տեսած «5-րդ ավենյու» տիեզերանավի կապիտան Ռայան Քլարքը փորձում է հաշտվել իրադրության ժամանակակից վիճակի հետ, իր տեղը գտնել տիեզերական զբոսաշրջության ինդուստրիայում եւ փոխհարաբերություններ հաստատել հաճախորդների ու գործընկերների հետ: «Ջադդի գալակտիկա» տիեզերանավը բաց տիեզերքում վնասվում է, եւ պարզվում է, որ դրան պատրաստ չեն ո՛չ ուղեւորները, ո՛չ կապիտանը:
Պրեմիերան տեղի կունենա հունվարին:
«ՎանդաՎիժն»
Երբ մենք խոսում էինք փոքր էկրանների վրա Marvel-ի էքսպանսիայի մասին, չէինք կատակում: «ՎանդաՎիժն»-ը կդառնա այս տարի Marvel-ի թողարկած երկրորդ սերիալը: Սյուժեի ստույգ նկարագրություն առայժմ չկա, հայտնի է միայն, որ սերիալն ուղղակիորեն կապված է 2021 թվականի «Դոկտոր Սթրենջ. Մուլտիտիեզերական խելահեղության մեջ» ֆիլմի հետ:
Սերիալի պրեմիերան նախատեսված է 2020 թվականի աշնանը-ձմռանը:
«Որսորդները»
Amazon-ը մեր դատին է ներկայացնելու միանգամայն յուրահատուկ նախագիծ՝ Ալ Պաչինոյի մասնակցությամբ: «Որսորդները» սերիալի գործողությունները ծավալվում են 1977 թվականի Նյու Յորքում: Նացիստներին որսող որսորդների խայտաբղետ խումբը տեղեկանում է, որ Հիտլերի հարյուրավոր բարձրաստիճան ներկայացուցիչներ ապրում են սովորական քաղաքացիների շարքում եւ գաղտնի մտածում են ԱՄՆ-ում Չորրորդ ռեյխ ստեղծելու մասին: Որսորդների խումբը ուղեւորվում է նացիստներին որոնելու, որ նրանց դեմ արյունահեղ արդարադատություն իրագործի եւ կասեցնի նոր ցեղասպանությունը:
Առայժմ չի հաղորդվում «Որսորդների» թողարկման ստույգ օրը:
Աղբյուր՝ news.am
