համաձայն եմ.

սուրբ թող լինի անունը քո.

բայց ես այլևս
փոքր չեմ
հարգելիս.
ու սովորել եմ
իսկապես տխրել
հիմար բաների համար.

ու սովորել եմ
մարդավարի
ինձ վարի տալ.

ու սովորել եմ
տեղը տեղին
փչացնել կյանքս.

ես լավ աշակերտ եմ.

այնքան լավը՝
որ ցուրտ ունեմ պահած
որպես օժիտ.
նույնիսկ եռման օրերի համար.

բայց ինձ ասա՝
ոնց փրկե՞մ ինձ չարից.
դու էն ասա՝
ոնց փրկե ՞մ ինձ Չարենց.
և եթե ժամանակ ունես.
ինձ նաև ասա՝
ոնց չփրկե՞մ ինձ.

պարոն անցյալ .
իմ հարազատ.
ինչ լավ է՝
որ քեզ հետ բերել
հնարավոր չէ.

բայց եթե
քո տեսողությունը
ավելի լավ է՝
ինձ նշաններ տուր.
ասա՝
սպասե՞մ
թե փնտրե՞մ մեկին
ով չգիտի
գալու ձևը.

նրա մասին խոսելիս
բառերից էլ լավ հոտ չի գալիս.

նրա մասին պատմելիս
ցավը գերազանցիկ է.
ու ոչ մի դեղ.
չի ջանում
ցավազրկել.

նրա մասին՝
քնում եմ բոլորի հետ.

նրա պատճառով՝
եղանակի տեսությունը
տնտեսությունն է եղանակի.

իմ անգրագետ անցյալ.
խնդրում եմ քեզ.
որպես ամենամտերիմ ընկեր՝
մի տար ինձ դեպի փորձություն.
պարզապես՝
տուն.
տուն տար ինձ.

_________________Եր Կար