Ad Astra-ն բացվեց Հոտորնի SpaceX ուսումնարանում 2014 թ.ին` կարճ ժամանակ անց այն բանից հետո, երբ Մասկը իր հինգ որդիներին հանեց Միրմանի շնորհալի երեխաների դպրոցից: Նա հրավիրեց Միրմանի ուսուցիչներից մեկին՝ Ջոշուա Դանին, ղեկավարելու նոր կրթական հաստատությունը: Ad Astra-ի գործունեության առաջին տարում Մասկի երեխաները (2004 թվին ծնված երկվորյակներ և 2006 թ.-ին ծնված եռյակ) կազմում էին աշակերտական կազմի կեսից ավելին, մնացած երեխաները SpaceX-ի աշխատակիցների ընտանիքներից էին, նշում է Ars Technica հրատարակությունը:

Ավելի ուշ, Ad Astra-ն փոքր-ինչ ընդլայնվեց. 2018 թվականի վերջին այնտեղ կրթություն էին ստանում 7-ից 14 տարեկան 30-ից ավելի աշակերտներ (ներառյալ Մասկի երեխաները): Այս դպրոցում ուսումնասիրում են բնական գիտություններ, մաթեմատիկա, ռոբոտաշինություն և արհեստական բանականություն: Ad Astra-ում գրեթե ամեն ինչ այլ կերպ է կազմակերպված` սկսած գնահատականներից (որոնք ամբողջովին բացակայում են) մինչև գաղտնիություն, որը շրջապատում է դպրոց ընդունվելու գործընթացը: Ավելի վաղ հաղորդվել էր, որ այնտեղ կարող են մուտք գործել միայն SpaceX-ի աշխատակիցների երեխաները, ընդ որում նրանցից միայն նրանք, ովքեր ստացել են հատուկ հրավեր:

«Ես SpaceX-ի տարբեր ընտանիքներից լսել եմ, որ նրանց այդպես էլ չհաջողվեց տեղեկություններ ստանալ դպրոցի մասին, չնայած որ այն նշվում էր որպես ընկերությունում աշխատելու առավելություններից մեկը», – ասում է Լոս Անջելեսի մասնավոր հիմնական դպրոցների մասին գրքի համահեղինակ Քրիստինա Սայմոնը:

Թվում է, թե վերջին շրջանում իրավիճակը փոխվել է: Եթե մինչ վերջերս դպրոցի կայքը բաղկացած էր միայն լոգոյից և էլփոստի հասցեից, ապա այժմ հայտնվել են տեղեկություններ ընդունելության մասին և գաղտնաբառով պաշտպանված պորտալի հղում աշակերտների ծնողների համար։

«Դպրոց ընդունվելիս մենք փորձում ենք հայտնաբերել այն աշակերտներին և ընտանիքներին, ովքեր կարող են նպաստել մեր փոքր թիմի ստեղծագործական միջավայրին և բազմազանությանը», – ասվում է կայքում: Ad Astra-ն ընդունում է 8-ից 13 տարեկան երեխաներին: Նախապատվությունը տրվում է Լոս Անջելեսից թեկնածուներին, բայց այլ երկրներից երեխաները նույնպես կարող են դիմել (չնայած դեռ պարզ չէ, թե ինչպես են կազմակերպվելու նրանց դասընթացները):

Երեխան պետք է լրացնի հարցաթերթիկ, որում մասնավորապես հարցվում է, թե արդյոք նրա ծնողներից որևէ մեկն աշխատում է SpaceX-ում, Tesla-ում կամ Boring Company-ում` Մասկի երեք ընկերություններում: Ծնողների կողմից դիմում կարելի է չներկայացնել, բայց անհրաժեշտ է կցել այնպիսի նախագծի կամ պլանի օրինակ, որը ցույց է տալիս «հետաքրքրվածություն, ամբիցիաներ և ինքնատիպություն», ինչպես նաև երեխայի փաստարկները առաջարկվող թեմաներից մեկի վերաբերյալ:

Հարցաթերթիկ ապագա աշակերտների համար

Դրանցում բարձրացված բոլոր խնդիրները ամբողջովին Մասկի ոգով են: Առաջին ակնարկում, որը վերնագրված է «Goldilocks», պատմվում է 11 հորինված մոլորակների մասին: Երեխաները պետք է նրանցից ընտրեն մարդկային համայնք հիմնելու երեք լավագույն և երեք վատագույն տարբերակները (ինչպես հայտնի է, Երկիրը հնարավորինս արագ լքելու գաղափարը համարվում է Մասկի հիմնական գերակայություններից մեկը):

Առաջադրանքներից մեկը

«Նկար №11»-ը պատմություն է հորինված հայտնի նկարչի կողմից իր հայրենի քաղաքում շինարարական աշխատանքների ընթացքում կորած կտավը հայտնաբերելու մասին: Կյանքի օրոք կինը կտակեց ուղղորդել իր ստեղծագործությունների վաճառքից ստացված ողջ եկամուտը երեխաների՝ արվեստի ուսուցմանը: Թեկնածուներին առաջարկվում է դասավորել հինգ հնարավոր գնորդներին՝ տարբեր ֆինանսական հնարավորություններով և տարբեր բիզնես հեղինակությամբ, ամենալավից ամենավատը հերթականությամբ:

«Լիճը» բնապահպանական աղետի նկարագրություն է: Ապագա աշակերտներին առաջարկվում է պարզել, թե որքան մեղավոր են կատարվածի համար վեց կողմերի ներկայացուցիչները՝ գիտնականները, քաղաքական գործիչները, ընտրողները, լրատվամիջոցները, աղտոտողները և մութ կերպարը՝ «տիկնիկների տերը», որին կոչում են «հարուստ մարդ, ով վախենում է, որ նոր կանոնները կարող են ազդել նրա բիզնեսի կայսրության վրա»։

Լավագույն աշխատանքների հեղինակները կհրավիրվեն մասնակցելու հարցազրույցի հաջորդ փուլերին: Բացի այդ, նրանց համար կկազմակերպվի էքսկուրսիա դպրոցում:

Թեկնածուները, ովքեր չեն որակավորվում, կկարողանան միանալ Ad Astra ուսումնական գործընթացին տնից․ տնօրեն Դանն ասաց, որ դպրոցը կպատրաստի անվճար առցանց ծրագիր այն երեխաների համար, որոնց ծնողները ընտրել են տնային ուսուցում:

Ad Astra-ն գրեթե ամբողջովին գոյություն ունի Մասկի միջոցներով: Ars Technica-ի փոխանցմամբ՝ նա 2014 և 2015 թվականներին դպրոցին նվիրել է տարեկան 475 հազար դոլար, ինչը վկայում են IRS-ին (Internal Revenue Service) ներկայացված հարկային փաստաթղթերը: Ad Astra-ում կան թերություններ. Օրինակ, հայտնի չէ` կշարունակի՞ նա զարգացնել դպրոցը, երբ իր երեխաներն ավարտեն ուսումը: