Թատրոնը մի աշխարհ է, որտեղ ամեն ինչ իրական զգացողությունների վրա է հիմնված / Մայիս Համբարձումյան

Հարցազրույց վերջին ուսուցիչը հեռուստասերիալում Տիգրանին մարմնավորող, դերասան Մայիս Համբարձումյանի հետ։

Մայիս, ի՞նչ է Ձեզ համար թատրոնը։

Թատրոնը մի աշխարհ է, որտեղ ամեն ինչ իրական զգացողությունների վրա է հիմնված։ Հնարավորություն ունես սխալվելու և ուղղելու այն հաջորդ անգամ բեմ բարձրանալու համար։ Թատրոնում կապը հանդիսատեսի հետ միանգամից է և փոխադարձ։ Կարճ ասած՝ ուրիշ աշխարհ։

Ինչպե՞ս առաջարկ ստացաք նկարահանվելու «Վերջին ուսուցիչը» Հ/ս-ում։

Իմացա, որ casting է հայտարարված, որն էլ անցկացնում է Հ1 -ը։ Գնացի, լուրջ տրամադրված չէի։ Նախորդ օրը շատ ուշ էի քնել և քննաթաթախ էի։ Առաջին փուլը անցնելուց հետո դուրս եկա ու հերթական casting-ի մտքով գնացի տուն։ Երկրորդ անգամ արդեն անսպասելի զանգահարեցին և կանչեցին վիդեո փորձարկման։ Եվ արդեն վերջում, երբ զանգահարեցին և ասացին , որ ցանկություն ունեն աշխատելու ինձ հետ, ես էլ առանց մեկ վայրկյան անգամ մտածելու համաձայնվեցի։ Վերջիվերջո Վարդգես Պետրոսյանի «Վերջին ուսուցիչը» ստեղծագործությունն էր էկրանավորվում: Դերասանի համար շատ կարևոր է մուտք գործել կինոասպարեզ ճիշտ և խելացի project -ով։

Ըստ Ձեզ ինչպիսի՞ն պետք է լինի հաջողակ դերասանը։

«Հաջողակ դերասան» արդեն իսկ ասում է՝ հաջողակ (ժպտում է) ։
Պետք է նաև լինել պնդաճակատ, բայց անհամ չէ։ Հաջողությունն ամեն մեկին տրված է, ուղղակի պետք է ճիշտ պահին այն ձեռքից բաց չթողնել և օգտագործել։ Վերջերս նայում էի «Hollywood» սերիալը, որից շատ բան հասկացա մասնագիտական։ Նաև պետք է գնաս զոհողության, որ հասնես արդյունքի։ Բայց դա չի նշանակում ոչինչ չանել և տանը պառկած սպասել, թե ո՞վ քեզ կնկատի կամ էլ հնարավորություն կտա կրկին երևալու էկրանից։ Հա, հաջողակ դերասանը նաև նա է, ում աստղայինը չի տանում և մնում է հասարակ հասարակությանը երբեմն հասանելի։

Կա՞ մի կերպար, որին կուզեիք կերպարանավորել։

Առաջին կուրսում խաղացել եմ «Համլետ» : Դերասանի պատմության մեջ խաղալ այդ բարդ կերպարը՝ այն էլ առաջին կուրսի ուսանող, իհարկե բարդ է և պատասխանատու։ Բայց այդպիսի կերպար, որ կցանկանամ խաղալ, բոլոր կերպարներն են, որոնք ըստ ռեժիսորի ինձ համապատասխան են։

Իսկ կերպար որից կհրաժարվե՞ք։

Չէ՛, չկա այդպիսին։ Դերասանը պետք է կերպարանավորի այն կերպարը, որը ամենաքիչն է ուզում։ Դե հաղթահարելու նպատակով։ Ռեժիսորն էլ պետք է ստանա իրենից դա։

Ո՞վ է դերասանի Ձեր իդեալը։

Իդեալներ չեմ փնտրում դերասանների մեջ։ Մի գուցե գոռոզ կթվամ կամ ինքնահավան, բայց այդպես է ճշմարտությունը։ Սիրելի դերասաններ ունեմ, երբեք չեմ փորձել նմանվել ավելի շատ ոգեշնչվել եմ իրենցից։

Մայիս, պատկերացրեք՝ Ձեզ ընձեռնվել է հնարավորություն ինչ որ բան փոխել մեր այսօրվա հեռուստաեթերում։ Ո՞րը կլինի այդ փոփոխությունը։

Կփոխեի բոլոր վատ հաղորդումները, այսինքն՝ կմաքրեի։ Հեռուստասերիալներ, որոնք նման են «Սանտա Բարբարա»-ի կկրճատեի միանշանակ։ Թույլ կտայի երիտասարդներին իրենց ցույց տային և երևային։

Եթե ոչ դերասանի, ապա ի՞նչ մասնագիտություն կընտրեիք։

Ժամանակին նախընտրում էի դառնալ օդաչու, բայց հետո հասկացա որ չեմ ուզում ամբողջ կյանքում սավառնել օդում։ Դերասան ու միայն դերասան։ Հիմա աշխատում եմ մարքետինգի ոլորտում, բայց այն թույլ է տալիս երևակայությանդ աշխատել։

Ինչպե՞ս եք հագեցնում Ձեր օրը արտակարգ դրության պայմաններում։

Արտակարգ դրություն, այդպիսին չեմ էլ ունեցել։ Սկզբնական շրջանում տանը մարզվում էի, ֆիլմեր էի նայում, դեպրեսվում էի և սպիտակում Հիմա սովորական իմ կյանքի հունով ընթանում եմ՝ տուգանվում եմ, աշխատում եմ, սպասում եմ (ժպտում է) ։

Վերջում կխնդրեի պատմել Ձեր մասին՝ ինչպիսի՞նն է Մայիս Համբարձումյանը բեմից և եթերից այն կողմ։

Լավ ընկեր։ Շատերն ինձ համարում են հետաքրքիր, իսկ ես ինքս ինձ համարում եմ ձանձրալի մարդ։ Սիրում եմ, երբ փորձում են Մայիսի վրա կեղտ շպրտել, դա ամենից շատն է ստիպում մարդուն ապացուցելու, թե դու ով ես։Իսկ թե ինչպիսին եմ, ավելի լավ կպատասխանեն կամ կներկայացնեն իմ ընտանիքը կամ ընկերները։

Ձեզ նույնպես կարող է դուր գալ