Սերը աշխարհի գեղեցկության կարգախոսն է / Մերի Գագիկի
– Ի՞նչ է Սերը:
– Սերը աշխարհի գեղեցկության կարգախոսն է։ Սերը այն է, ինչի մասին պետք է լռելով գոռալ։ Կյանքը առանց սիրո՝ Հավատացե՛ք, իմաստը կկորցնի։ Իրական սերը այն սերն է, որի մեջ չկա շահ ու կեղծավորություն։ Բառերով ծաղկեցրած սերերը անհոտ ծաղիկների նման են, եթե զգացած չեն։
– Սերը զգացմունք է, թե՞:
– Սերը զգացմունք է և դրա հետ մեկտեղ՝ապրելակերպ։ Օդը շնչում ես ու զգում ես, որ ապրում ես։ Ջուրը խմում ես ու զգում ես, որ հագենում ես։ Օդը ու ջուրը միասին ապրելակերպի մասնիկ են։ Իսկ սերը զգալով և՛ ապրում ես, և՛ հագենում։
– Ո՞րն է Ձեր կյանքի կարգախոսը:
– Որպես այդպիսին չունեմ։ Բայց եթե ունենաի, բոլոր բառերի տողատակերում անկեղծությունը ու մաքրությունը կլիներ։
– Ասում են սիրուց ատելություն մեկ քայլ է, համաձա՞յն եք:
– Անկեղծ ասած՝ այո՛։ Երբ սիրում ես, աչքերդ փակում ես աշխարհի վրա ու հոգիդ բացում ես նրա առաջ։ Այդ ժամանակ սիրտդ ու հոգիդ չեն ուզում նկատել նրա թերությունները։ Ու երբ պահի տակ աչքերդ բացում ես ու տեսնում ես ո՞վ էր իդեալդ մի ժամանակ, միանգամից հիասթափվում ես ու սկսում ես ատել։
– Ի՞նչ կարծիք ունեք հայ ընթերցասերների մասին, ի՞նչն է նրանց գրավում:
– Իրականում գրողի առաջադիմությունը կախված է մեծամասամբ ընթերցողից։ Մերօրյա գրողների բախտը բերել է, որովհետև իսկապես ընտիր ընթերցողներ ունենք ու նրանց տված դրական էներգիան անսահման է։ Բնականաբար նրանց գրավում է այն թեմաները որոնք ավելի մոտ են իրենց սրտին։ Շատ անգամ են գրում «Սրտիցս էր», երևի հենց դա էլ գրավում է նրանց։ Մենք գրողներս իհարկե նրանց ճաշակն ու գերադասելի թեմաները չենք անտեսում։
– Ի՞նչ կարծիք ունեք Հայաստանում կրթական համակարգի հետ կապված, ի՞նչ խորհուրդ կամ գաղափար ունեք:
– Լսել եմ, որ օնլայն կրթությունը հետո էլ է գործելու։ Դրան կողմ չեմ, որովհետև եթե ուսուցիչը աչքիդ առաջ չէ ու նույն սենյակում չեք, ամբողջությամբ չես կարողանում հասկանալ տվյալ դասը։ Նաև ավելի լավ կլիներ, որ անվճար բարձրագույն կրթությունը Հայաստանում էլ գործեր։ Խելացիները գումարի պատճառով չպետք է ներքևում մնան։ Բայց իհարկե որոշակի պայմաններով։
– Ի՞նչ կոչ ունեք հայ հասարակությանը:
– Մնացեք տանը և եղեք առողջ:
