Միֆեր մարքեթինգային հետազոտությունների մասին (Մաս 3)
Մարքեթինգային հետազոտությունների հետ կապված միֆերն ասես անվերջ լինեն։
Իրականում այդպես էլ կա, եթե դու հստակ չես պատկերացնում, թե ինչ կարող են տալ այդ հետազոտությունները քո ընկերությանը և ինչից այն զրկել։
Շարունակենք առաջին և երկրորդ մասերը․․․
Միֆ 6․ Հետազոտությունները թույլ են տալիս մանրամասն հասկանալ սպառողների պահանջմունքերը։
Իրականում՝ եթե նախորդ միֆերին հիմնվելով՝ ընկերությունը չէր կրի մեծ վնասներ, ապա այս միֆը շատ ավելի կործանարար կարող է լինել։ Իսկ դա անպայման տեղի կունենա, եթե ձեր բիզնես գործընթացները հիմնված լինեն բացառապես հետազոտական ընկերությունների տրամադրած վերլուծությունների վրա։
Հետազոտությունների արդյունքերը սովորաբար մշակվում են մարքեթինգային ընկերությունների աշխատակիցների կողմից։ Արդյունքում, հավաքագրված տվյալները հասնում են հետազոտական ընկերության մենեջերին, ով իրականացնում է վերջնական «ախտորոշում» և ում սուբյեկտիվ կարծիքի հիման վրա էլ պատվիրատուն կառուցում է իր հետագա քայլերը։
Այսինքն, ձեր քայլերը հիմնված են մեկ մարդու սուբյեկտիվ կարծիքին, ով գուցե տիրապետում է հետազոտությունների անցկացման, մարքեթինգային վերլուծությունների սկզբունքներին, բայց գաղափար չունի ձեր բիզնեսի նրբությունների մասին։ Իսկ սա սխալ է։
Շատ ընկերություններ՝ պատվիրելով շուկայի հետազոտություն, համոզված են, որ վճարում են ոչ թե տվյալների հավաքագրման, այլ պատրաստի արդյունքների տրամադրման համար։ Եվ, առանձնապես չեն էլ ուսումնասիրում հետազոտության ընթացքը, որը ներառում է առանձին մասնակիցների կարծիքները։ Բայց հիշեք՝ դուք եք ձեր բիզնեսի տերը։ Ձեզանից լավ ոչ ոք չի տիրապետում ձեր բիզնեսի առանձնահատկություններին, և մուտք գործել շուկա՝ հիմք ընդունելով որևէ հետազոտական ընկերության մարքեթինգի աշխատակցի սուբյեկտիվ կարծիքը, կարող է լուրջ կորուստներ բերել ձեզ։
Վճարելով հետազոտությունների անցկացման համար՝ ինքներդ վերլուծեք ստացված տվյալները, պատկերացում կազմեք ձեր պոտենցիալ սպառողի մասին, ինքներդ լսեք նրա կարծիքը, և ապա որոշում կայացրեք՝ արժե թողարկել նոր արտադրանք, թե՞ ոչ։
Միֆ 7․ Շուկայի հետազոտությունը հաջողված ապրանքի թողարկման գրավականն է։
Իրականում՝ ժամանակը թանկ է, և մինչ դուք մտածում եք, ձեր մրցակիցներն արդեն գործում են։
Ենթադրենք՝ դուք հետազոտել եք X ապրանքի շուկան, համապատասխան գնային սեգմենտում բացահայտել եք ազատ խորշեր, վերլուծել եք տվյալ ապրանքի դրական և բացասական կողմերը, ինչպես նաև սպառողների վերաբերմունքը և որոշում եք կայացրել թողարկել նմանատիպ մրցակցային արտադրանք։ Ի՞նչ է կատարվում այնուհետև․․․
Պետք է հիշել, որ ապրանքի գծագրումից մինչև թողարկում ընկած ժամանակահատվածը մոտավորապես 5-8 ամիս է։ Իսկ այս ընթացքում շուկայի կոնյուկտուրան կարող է զգալի կամ արմատապես փոխվել։ Մրցակիցները նույնպես անընդհատ մոդիֆիկացնում են իրենց արտադրանքը, ինչը կարող է տևել շատ ավելի կարճ՝ մոտ 3-5 ամիս։
Հնանում են ձեր իրականացրած հետազոտության տվյալները, քանի որ սպառողները ևս չեն դոփում տեղում։ Եվ եթե ձեր մրցակից ընկերություններն ունեն արդեն լոյալ հաճախորդներ, ապա հավանականությունը՝ որ վերջիններս կընտրեն հենց այդ ընկերության մոդիֆիկացված արտադրանքը, շատ ավելի մեծ է , քան եթե դուք 8 ամիս հետո թողարկեք նմանատիպ նորը։
Ինչպես շուկան, այնպես էլ մեր պահանջմունքները անընդհատ մոդեռնիզացվում, ենթարկվում են կատարելագործման՝ քայլելով ժամանակին զուգընթաց։ Այդ պատճառով էլ փորձեք գործել խելացի, հաշվարկված, և ամենակարևորը՝ արագ։
Ընհանրացնելով ասենք, որ հետազոտությունները կարևոր են նոր ապրանքների թողարկման համար։ Բայց, նախքան դրանց անցկացումը, դուք պետք է հստակ պատկերացում կազմեք թողարկվելիք ապրանքի բնութագրիչների մասին կամ մտքում ունենաք դրա նախնական, մշակված կոնցեպտը։
Եթե դեռ հստակ չեք պատկերացնում՝ ինչ ապրանք թողարկել, ապա մի սկսեք շուկան հետազոտել։ Ստեղծեք ունիկալ, չկրկնվող արտադրանք և դարձեք շուկայի լիդեր։ Այլ ոչ թե հետազոտելով արդեն գոյություն ունեցող անալոգները՝ ստեղծեք խղճուկ կրկնօրինակ և սպասեք, որ ձեզ կնկատեն սուպերմարկետի բազմահազար ապրանքների մեջ։
Կարդացեք նաև՝
Միֆեր մարքեթինգային հետազոտությունների մասին (Մաս 1)
Միֆեր մարքեթինգային հետազոտությունների մասին (Մաս 2)
