Համավարակը բացի պրոբլեմներ ստեղծելուց նաև նոր հնարավորություններ ցույց տվեց մեզ / Գարիկ Աղասյան
«ՄարքՄեդիա» կրթական կենտրոնը նախագծել է նոր ծրագիր՝ առցանց սեմինարներ՝ «Ինչպե՞ս գրել դրամաշնորհ» խորագրով, որը վարում է «Հայի Բռունցք» ՀԿ-ի նախագահ, «ՄարքՄեդիա» կրթական կենտրոնի հիմնադիր Գարիկ Աղասյանը, ում հետ զրույցում խոսեցինք նաև հետագա անելիքների մասին։
Մի փոքր պատմեք ծրագրի մասին, որտեղի՞ց սկսվեց ամեն ինչ։
«Հայի բռունցք» ՀԿ-ի կողմից հիմնադրված «ՄարքՄեդիա» կրթական կենտրոնի առցանց հարթակը նոր է, մեկնարկել է 2021 թվականին, առհասարակ կենտրոնը ավելի վաղ պատմություն ունի. հիմնադրվել է 2019-ին՝ նպատակ ուենալով զբաղվել ք. Հրազդանում մարքեթինգի, մեդիագրագիտության դասավանդմամբ, սակայն, իրեն 2019 թվականին, ըստ սահմանված թիրախների արդարացրած կենտրոնը, ցավոք 2020-ին չկարողացավ գործունեություն ծավալել համավարակի պատճառով, իսկ համավարակը, ինչպես նշել եմ բազմիցս, բացի պրոբլեմներ ստեղծելուց նաև նոր հնարավորություններ ցույց տվեց մեզ. օրինակ առցանց հարթակներով կրթական ծրագրերի անցկացումը, որից էլ այսօր օգտվում ենք:
Ինչպիսի՞ աշխատանքներ եք կատարում այսօր և ինչպիսի՞ գործիքակազմ է կիրառվում որակյալ արդյունք ստանալու համար։
«Ինչպե՞ս գրել դրամաշնորհ» սեմինարին նախապատրաստվում ենք լուրջ և կայացած մասնագիտական խմբով, սեմինարներին նոր խմբեր ներգրավվելու համար իրականացվում է ակտիվ մարքեթինգային աշխատանքներ, նյութերը ևս մշակվում են հնարավորինս մատչելի, հասկանալի կերպով, հնարավորինս խտացված կուրս ենք մշակել, այնպես, որ 3 սեմինարը բավականացնի նյութի լիարժեք փոխանցմանը, իսկ նյութերը հիմնականում մեր փորձառության վրա են հիմնված:
Ովքե՞ր կարող են դիմել ծրագրի շրջանակնեում։
Կարող են դիմել յուրաքանչյուրը, եթե հետաքրքրված են դրամաշնորհով, սակայն օգտվելով Ձեր հարթակից՝ ցանկանում եմ ֆիքսել, որ ինձ համար սկզբունքային է հայրենասիրությունը, ազգապահպանումը, հանրային կյանքի ակտիվացումը, ուստի համանման գաղափարներ կրողները կարող են մեծ հույսեր կապել մեր թիմի հետ , վստահ լինել, որ ամեն ինչ միայն սեմինարներով չի ավարտվելու, մենք պատրաստ ենք նաև համագործակցել մասնակիցների հետ:
Մեզ դիմելու մասին առավել մանրամասն տեղեկություններ կարող եք գտնել «ՄարքՄեդիա»կրթական կենտրոնի ֆեյսբուքյան էջում։
Դիմելու համար անհրաժեշտ է լրացնել հայտադիմումը, որից հետո հնարավոր կարճ ժամանակահատվածում մեր աշխատակիցները կապ կհաստատեն հայտատուի հետ։
Հակիրճ խնդրում եմ ներկայացրեք, ի՞նչ է դրամաշնորհը և ինչու՞ սովորել դրամաշնորհային ծրագիր։
Ասելով դրամաշնորհ մենք գործ ունենք հանրային ծրագրերի հետ, որոնք հետապնդում են հստակ մեկնաբանված թիրախային խմբերի հասարակական շահը, ինձ համար, գոնե, դրամաշնորհային կարողությունները կարևոր են գաղափարները կյանքի կոչելու, հասարակական ոլորտը առողջացնելու և զարգացնելու համար: Դե ինչ արած մեզ բաժին է հասել նման ժամանակաշրջան:
Կա՞ն նոր գաղափարներ հետագայի համար և ի՞նչ ծրագրեր են արդեն իսկ կյանքի կոչվել։
Այժմ թեմատիկ սեմինարների շարք է պատրաստվում, հասարակական, մարքեթինգային, մեդիա ոլորտներին առնչվող, նաև կենտրոնը հրավիրում է համագործակցության սեմինարավարների:
