Այս անգամ զրուցակիցս ՀՀ փաստաբանների պալատի անդամ, հանրային պաշտպան Լիլիթ Թարջիմանյանն է։

1.Եկեք սկսենք մասնագիտության ընտրության հարցով։ Ինչու՞ հենց փաստաբանի մասնագիտությունը։

Մասնագիտության ընտրությունը պայմանավորված է եղել մարդկանց օգնելու, նրանց խախտված իրավունքները վերականգնելու և այդ ճանապարհով արդարության հասնելու ցանկությամբ:

2.Կպատմե՞ք,թե ի՞նչ դժվարությունների եք հանդիպել մասնագետ դառնալու ճանապարհին։

Օօ՜օ, սկսեմ ԲՈՒՀ-ից… Այդ պահից իհարկե բավականին ժամանակ է անցել: Չեմ թաքցնի, որ շատ դժվար է եղել միջնակարգ դպրոցն ավարտելուց հետո անմիջապես հարմարվել բարձրագույն ուսումնական հաստատության կրթական պրոցեսին և միջավայրին: Նշեմ, որ ավարտել եմ Երևանի Պետական Համալսարանի իրավաբանական ֆակուլտետը: Շատ-շատ գեղեցիկ հիշողություններ ունեմ ուսանողական տարիներիս հետ կապված՝ համեմված ուսման պրոցեսի դժվարություններով: Փաստաբանի մասնագիտությամբ սկսել եմ զբաղվել ավելի հասուն տարիքում:

3. Կհիշե՞ք՝ ինչպիսի հույզեր ունեիք, երբ առաջին անգամ մտաք դատարան որպես փաստաբան։

Գիտեք, երբ առիթ է լինում շփվելու ծանոթ դատավորների հետ, ովքեր կիսվում են փաստաբանների հետ աշխատելու իրենց փորձով, բոլորն էլ նշում են, որ հենց առաջին իսկ պահից իրենց հասկանալի է դառնում փաստաբանի՝ առաջին անգամ դատարանում հանդես գալը: Մի տեսակ շա՜տ անսովոր վիճակում էի, ինձ համար շատ պատասխանատու պահ էր առաջին անգամ դատական նիստի մասնակցելը։ Հիշում եմ՝ օրեր շարունակ պատրաստվում էի այդ մասնակցության համար։

4.Լիլի՛թ, Ձեր հարցազրույցներից մեկում նշել էիք,որ հանրային պաշտպանին դիմում են բոլոր հնարավոր միջոցները սպառելուց հետո։ Ըստ Ձեզ՝ ինչո՞վ է դա պայմանավորված։

Այո, քանի որ ըստ էության փաստաբանին կամ հանրային պաշտպանին դիմելու անհրաժեշտությունը հիմնականում առաջանում է դատական կարգով իրավունքների իրացման փուլում, այսինքն՝ բոլոր հնարավոր միջոցները սպառելուց հետո:

5.Հրազդանում կատարել եք անվճար խորհրդատվություն տարեցների հետ։ Որո՞նք էին հիմնական խնդիրները, որով Ձեզ դիմում էին տարեցները։

Տարեցները հիմնականում դիմում են սոցիալական հարցերի հետ կապված ուղորդման խնդիրներով: Եվ ինչու ոչ, ունեն բավականին շատ խնդիրներ կապված իրենց իրավունքների խախտման հետ:

6.Դուք հաճախ եք անցկացնում անվճար խորհրդատվություն։ Մի փոքր կխոսե՞ք այդ մասին։

Այո, ինչպես նշվեց, հանդիսանում եմ հանրային պաշտպան և հետևաբար օրենքով նախատեսված խմբին մշտապես տրամադրում եմ խորհրդատվություն, ինչպես նաև Հրազդան քաղաքում գործող հասարակական կազմակերպությունների հետ մշտապես կազմակերպում և իրականացնում ենք նմանատիպ միջոցառումներ: Հավատացեք, կարիքը շատ կա, դիմողները բազմաթիվ են:

7.Այս օրերին ևս հանդես եք գալիս հասարակական գործունեությամբ։ Կորոնավիրուսի դեմ պայքարում ունեք Ձեր լուման։ Մի փոքր էլ խոսենք այս թեմայի շուրջ։

Նախ նշեմ, որ Կորոնավիրուսի հետևանքով հայտարարված արտակարգ դրությամբ պայմանավորված Հրազդան քաղաքում ձևավորվեց արագ արձագանքման թիմ՝ կազմված մասնագետներից և գործող մի քանի հասարակական կազմակերպությունների ներկայացուցիչներից: Թիմի ներսում իրականացրեցինք աշխատանքների համակարգում՝ կապված խոցելի խմբին պարենային ապրանքների մատակարարման, ինչպես նաև՝ մասնագիտական խորհրդատվության տրամադրման հետ: Եվ հատկապես շատ կարևորվեց Կորոնավիրուսի հետևանքների չեզոքացմանն ուղղված կառավարության կողմից ընդունված սոցիալական և տնտեսական ծրագրերի վերաբերյալ խորհրդատվությունը, քանի որ որոշումներն ընդունվում են շատ արագ, առկա են անհստակություններ, բացեր և ինչու չէ նաև տեխնիկական խնդիրներ: Եվ այս փուլում քաղաքացիները մասնագիտական աջակցության լուրջ կարիք ունեն: Պարզապես պետք է նշեմ, որ բոլոր խնդիրները դինամիկ կերպով արագ արձագանք և լուծում են ստանում:

8.Եթե ոչ փաստաբան, ապա ի՞նչ մասնագիտություն կընտրեիք։

Չկա այն երկրորդ մասնագիտություն, որը կկատարեի այսքան մեծ նվիրվածությամբ և սիրով, փաստաբանի մասնագիտական գործունեությունը բխում է իմ էությունից՝ լուծել խնդիրը և հասնել հաղթանակի, ինձ ճանաչողները կփաստեն դա:

9.Վերջում ի՞նչ խորհուրդ կտաք ապագա փաստաբաններին։

Բոլոր ապագա գործընկերներիս խորհուրդ կտամ այս ոչ այնքան հարթ մասնագիտական ճանապարհն ընտրելիս դժվարություններն ընդունեն որպես մարտահրավերներ, կարևորեն մասնագիտական գիտելիքների մշտապես ձեռքբերումը և փաստաբանի աշխատանքին վերաբերվեն վարակիչ սիրով՝ այն համարելով մարդկանց օգնելու առաքելություն:

Ձեզ նույնպես կարող է դուր գալ