Պարե՞նք… | Թվիսթ

Թվիսթը ուրախ, կենսախինդ, կրակոտ և էներգիայով լի պար է: Այն նման չէ ոչ մի պարի: Հենց այդ յուրօրինակությունն էլ այդքան մեծ ճանաչում բերեց նրան: Այս ռիթմիկ պարը հանրահայտ է դարձել 1960-ական թվականների սկզբին՝ շնորհիվ ամերիկացի երգիչ և պարող Չաբբի Չեքերի:

Թվիսթի հիմնական շարժումը ոտքի թաթի փոքր պտույտներն են: Եվ այդ շարժումն էլ հանդիսացել է այս պարի անվան ստեղծմանը. անգլերեն Twist  թարգմանաբար նշանակում է «պտույտ»:

1961-ին Չեքերը հեռուստատեսությամբ ցուցադրեց մի նոր պար, որն ինքն էր հորինել: Այն պարելու համար զուգընկերոջ կարիք չունես և կարող ես հանգիստ մենակ պարել: Չաբբի Չեքերի ”Let’s Twist Again” հիթը լռեցրեց ամերիկյան բոլոր ռիթմերը, և որոշ ժամանակ անց այս ռիթմը հզոր թափով տարածվեց նաև Եվրոպայում: Շարժումները շատ պարզ ու հեշտ էին թվում:

Բայց թվացյալ այս պարզությունը պատիժ դարձավ. ԱՄՆ-ում ավելացան զանազան վնասվածքներն ու կոտրվածքները: Հիվանդանոցներ էին ընկնում շատ մարդիկ՝ ծնկների, կոճերի և ազդրի հոդախախտումներով:

Ինքը՝ Չաբբի Չեքերը, այսպես է նկարագրում իր ստեղծած պարը.

«Սկզբում դուք հանգցնում եք ծխախոտի մնացորդը ձախ ոտքի թաթով՝ աշխույժ պտտելով ծնկային հոդը և տեղափոխելով ծանրության կենտրոնը աջ ոտքի վրա: Այնուհետև ծանրության կենտրոնը տեղափոխե’ք ձախ ոտքի վրա և նույնը կրկնե’ք աջ ոտքով: Ընդ որում՝ թեթևակի առա’ջ թեքվեք և ձեռքերը շատ մի’ թափահարեք: Ձեռքերի շարժումների մեջ պետք է լինի թեթևակի զսպվածություն: Հետո աստիճանաբար աջ ոտքը մի քիչ առաջ եք բերում և նույնը կրկնում ձախ ոտքով: Եվ միայն դրանից հետո սկսում եք ծխախոտը հանգցել երկու ոտքով՝ ընթացքում հնարավորինս հետ թեքվելով»:

Դե ի՞նչ, պարե՞նք…