Կարիերայի զարգացման ակումբ Հրազդանում

«Հայի բռունցք» ՀԿ-ի և Khachatryan Production-ի համատեղ ջանքերով հուլիսի 1-ից ք. Հրազդանում գործում է «Կարիերայի զարգացման ակումբ»-ը, որին մասնակցում են թե´ արհեստավարժ, թե´ սկսնակ երգիչ-երգչուհիները, երգահանները, երաժիշտները, գործիքավորողները և երգարվեստի այլ ներկայացուցիչներ: Այս ամենի շուրջ առավել մանրամասն զրուցեցինք «Հայի բռունցք» ՀԿ-ի հիմնադիր նախագահ Գարիկ Աղասյանի և Khachatryan Production-ի հիմնադիր Գոռ Խաչատրյանի հետ,ովքեր ծրագրի համահիմնադիրներն են:
Այն հարցին, թե ինչպե՞ս գաղափար առաջացավ ստեղծելու նախագիծը, Գարիկը պատասխանում է, որ գաղափարը իրենց երկուսի մոտ տարբեր էր, վերջում ստեղծեցին մի նոր 3-րդ ծրագիր և այն կյանքի կոչեցին։

– Մենք պատահական չենք ընտրել «Կարիերայի զարգացման ակումբ» անվանումը։ Եթե դուք օժտված եք տաղանդով և դրա շնորհիվ կարող եք ձեր կարիերայի հիմքը կերտել, ապա մենք ստեղծել ենք այնպիսի թիմ, որը կօգնի ձեզ անել դա։
Փորձեցինք նաև ճշտել, թե ինչպիսի՞ խոչընդոտներ են առաջացել.
-Առաջին խոչընդոտը համավարակն է,- նշում է ՀԿ-ի հիմնադիրը,- ելնելով մասնակիցների անվտանգությունից՝ ամեն օր հավաք կազմակերպել չենք կարող, հանդիպումները անցկացնում ենք բացօթյա՝ պահպանելով սոցիալական հեռավորությունը, իսկ երգչի և երաժիշտի միջև այդ հեռավորությունը դժվարացնում է աշխատանքը։
Ակումբի անդամներն արդեն 20 հոգի են, թեև սա քիչ թիվ է, բայց համահեղինակները չեն ընկճվում։

– Երբ զբաղվում ես այն ամենով, ինչ սիրում ես, արդեն մեծ ձեռքբերում է,- նշում է Գոռ Խաչատրյանը,- ինձ առավել ոգեշնչում է այն, որ տեսնում եմ՝ իրոք կան մարդիկ, ովքեր ուզում են մասնակցել ծրագրին։ Առավել հետաքրքիր է տարիքով ավելի փոքրերի հետ աշխատանքը, քանի որ նրանց կարիերայի ուղին կայանում է հենց մեր աչքի առաջ, ինչը ևս բավական ոգեշնչող է։
Առաջին բացօթյա հանդիպումը արդեն կայացել է, նշում է մեր զրուցակիցն ու հավելում.
– Առաջին հանդիպումը ճանաչողական էր. հյուրերը երգել են, ասմունքել և յուրաքանչյուրը ցույց է տվել իր տաղանդը։
Այն հարցին, թե մասնակիցների շրջանում կա՞ն առավել աչքի ընկնողներ, Գոռ Խաչատրյանը պատասխանում է.
– Աչքի ընկնողներ կան, բայց առանձնացնել չեմ ցանկանա, նշեմ, որ կան մասնակցներ, ովքեր իրոք շահագրգռված են և միշտ փորձում են աշխատել։ Սա ինձ բավական ոգեշնչում է, և հավելեմ, որ մենք ամեն կերպ փորձում ենք ստեղծել նորը և տարբերվողը, մենք ուզում ենք ստեղծել մեր յուրօրինակ երանգը։
Մովսեսը այս ծրագրի մասնակիցներից է և շատ ուրախ է իր քաղաքում տեսնելու նման ծրագիր.

– Ուրախ եմ, որ իմ քաղաքը իր տաղանդաշատ մարդկանցով առաջ կգնա ու կտարբերվի։ Սա հրաշալի հնարավորություն է այն մարդկանց համար, ովքեր ցանկանում են առաջընթաց ունենալ։
Այն հարցին, թե ինչպե՞ս է տեղեկացել ծրագրի մասին, պատասխանում է.
– Ինստագրամ սոց.կայքի ընկերներիցս մեկի էջում պատահաբար հանդիպեց ծրագրի մասին հայտարարությունը, հետաքրքրեց ինձ, հարցրի և որոշեցի մասնակցել։
Վերջում համահիմնադիրները նշում են, որ իրենք ունեն ակնկալիքներ առավել մեծ ձեռքբերումների և սպասում են թիմի նոր անդամների համալրմանը.
– Մեզ կարող են միանալ մարդիկ, ովքեր կցանկանան օգնել իրենց պրոֆեսիոնալիզմով և անցած ճանապարհով։ Սա հրաշալի հնարավորություն է նաև նրանց համար, ովքեր ցանկանում են կատարել քայլ դեպի իրենց երազանքը։ Կարող ենք ասել, որ Հրազդանի երիտասարդները հավաքվել են, որպեսզի լավ գործ կատարեն։ Մենք էլ կփորձենք այս կերպ հաղթահարել համավարակը։