Ժորա Քոսակյան – «Պտտվի՛ր Երկիր»

 

Պտտվի’ր երկիր,ինչ ես կանգ առել,
Դե’,պոկվիր տեղից, որ անցնի, գնա
Ամենն այս՝ ազգիս բկին է կանգնել
Հոգնել է ազգս թող հանգստանա ։

Հիշողությունից ջնջի’ր, այս տարին,
Նորը կարկատենք երեսին նրա
Թող մնա կռիվն անցյալի գերին
ՈՒ մեր ներկայից` վերանա, գնա։

Ինձ շատ են պատմել եղբայրներս մեծ՝
Ինչպե՞ս են ապրել կռվի օրերին,
Ինչպե՞ս արկերի պայթյունների մեջ՝
Մանկության խաղից չկտրվեցին։

Թող այսօրվանից հետո չպատմեն,
Ու լացը սրբեն կորուստի ցավով,
Պտտվի՛ր երկիր,այսքանից ավել
Թող, որ չհիշվեն օրերը սևով ։

Պտտվի՛ր երկիր,տար մեզ հետոներ,
Ուր օրացույցները կարմիր է լցված,
ՈՒր մենք ձեռքներս առած գավաթներ՝
Խմում ենք հպարտ հաղթության կենաց ։