Նորաձևությունը հագուստի, կոշիկների, կենսակերպի, աքսեսուրաների, մազերի և մարմնի հարդարման տարածված ձև կամ գործունեություն է։ Այն ուղղորդող և հաճախ կայուն թրենդ է, համաձայն որի մարդիկ հագնվում են։ Նորաձևությունն ունի 2 միտում: Առաջինը նմանակումն է, որը նպատակ ունի ընդօրինակել փորձը կամ լավ ճաշակը, երկրորդը՝ հասարակական ճնշումն է՝ հասարակությունից դուրս, ծաղրի առարկա լինելու վախը։

Կան հետաքրքիր և զարմանալի փաստեր. ներկայացնենք մի քանիսը.

Նյու Յորքում առաջին պաշտոնական նորաձևության շաբաթը սկսվեց 1943 թ.: Երկրորդ համաշխարհային պատերազմի ընթացքում ֆրանսիական նորաձևությունը մեծ հաջողությունների ես հասել: Ամերիկացիների հիմնական նպատակն էր շեղել բոլորի ուշադրությունը ֆրանսիական նորաձևությունից և ճանապարհ հարթել ամերիկյան դիզայներների համար:

40 նորաձևության շաբաթների և 100 պաշտոնական միջոցառումների շարքում կան հինգ առավել նշանավոր նորաձևության շաբաթները, որոնք անցկացվում են աշխարհի նորաձևության մայրաքաղաքներում` Միլանում, Նյու Յորքում, Բեռլինում, Լոնդոնում և Փարիզում:

Նապոլեոն անունը մենք կապում ենք միայն պատմության և քաղաքականության հետ, սակայն իրականում նա նպաստել է նորաձևության նոր ձևի զարգացմանը: Երբեմն մեր բաճկոնների թևքերի վրա կոճակներ ենք նկատում, որը Նապոլեոնի «ձեռքի գործն է»: Նա անընդհատ տեսնում էր մի տեսարան, որից հոգնել էր. զինվորները իրենց քթերը սրբում էին թևքերին: Եվ որոշեց այսպիսի մի բան անել, որն էլ նորաձևության մեջ մտավ և օգտագործվում է մինչ օրս:

Մինչև 19-րդ դարը դիզայներները օգտագործում էին փոքրիկ տիկնիկներ՝ իրենց հագուստների հավաքածուն ցուցադրելու համար, որովհետև իսկական մոդելներ այդ ժամանակահատվածում գոյություն չունեին:

Առաջին կեղծ թարթիչները հորինվել են 1916թ., հոլիվուդյան համր ֆիլմի պրոդյուսեր Դեյվիդ Ուորկ Գրիֆիթի կողմից: Նա ուզում էր բարձրացնել իր դերասանուհու թարթիչները՝ նրան ավելի գեղեցիկ դարձնելու համար, որն էլ արեցին բնական մազերով:

Մեր օրերում կանայք հաճախ են հոնքերը հաստացնում, քանի որ խիտ հոնքերը շատ նորաձև են: Իսկ դուք գիտե՞ք, որ Վերածննդի դարաշրջանում ընդունված էր սափրել հոնքերը: Ուշադի’ր նայեք Մոնա Լիզայի (Ջոկոնդայի) նկարը:

Կարճ մազերը մեր օրերում շատ նորաձև է, սակայն միշտ չէ, որ դա այդպես է եղել: 1800թ.-ից  մինչև 1900թ. կարճ սանրվածքով կինը անհավատարմության խորհրդանիշն է եղել:

Եթե դուք հիփ-հոփ նորաձևության ոճի սիրահար եք, ապա սիրում եք հագնել պարկանման տաբատներ: Ուստի պետք է իմանաք այդ տաբատների ծագման պատմությունը: Սրանք ծնվել են Լոս Անջելեսում` բանտում:  Բանտարկյալներին չէին թույլատրում կրել գոտիներ, այնպես որ նրանք սովոր էին հագնել լայն տաբատներ, որոնք էլ մտան նորաձևության մեջ և ընդունվեցին մարդկանց կողմից:

Դոկ Մարթենսի առաջին զույգ կոշիկը ստեղծվեց հին անվադողերից:

Իտալական նորաձևության դիզայներ Վալենտինո Գարավանին  ստեղծեց կարմիր զգեստներ նույնքան հայտնի, ինչպես Կոկո Շանելի փոքրիկ սև զգեստն էր:

Նրա կարմիր հագուստը այնքան մեծ ժողովրդականություն վայելեց, որ վաստակեց «Valentino Red» մականունը: