Երեխայի մայրը «հակապատվաստումայինների» հորդորով բժշկի նշանակած դեղը չէր խմացրել: Սոցցանցը խոստացել էր ուշադրություն դարձնել պատվաստումների մասին ապատեղեկատվություն տարածողներին, բայց 139 հազար մասնակից ունեցող խումբը դեռ գործում է:

Փետրվարի սկզբին Կոլորադոյում մահացել է Նաջիի որդին: Տեղի լրատվամիջոցները գրում են, որ դա նահանգում գրիպի սեզոնին արդեն մանկական երկրորդ մահվան դեպքն է: Երեխայի մահից չորս օր առաջ նրա մայրը Ֆեյսբուքում գրառում է կատարել պատվաստման դեմ հանդես եկողների խմբում: Նրան խորհուրդ են տվել փոքրիկին դեղ չտալ գրիպի համար և օգտագործել բնական միջոցներ, այդ թվում և՝ կրծքի կաթ:

Չնայած Facebook-ի խոստմանը՝ սոցցանցից պատվաստումների վտանգավորության մասին կեղծ լուրերը հեռացնելու մասին, տասնյակ հազարավոր մարդիկ հակառակի քարոզող խմբերում են ընդգրկվում՝ կոչ անելով հրաժարվել պատվաստումներից և օգտագործել ժողովրդական միջոցներ:

Գրիպի համաճարակի թեժ շրջան է ԱՄՆ-ում: Նաջիի ընտանիքում հիվանդ էին բոլոր երեխաները

Գրիպի այս սեզոնին ԱՄՆ-ում գրանցվել է 19 մլն հիվանդացություն: 10 հազար մարդ մահացել է, որոնցից 68-ը՝ երեխաներ: Նաջիի ընտանիքում, նրանից բացի, ևս 3 տղաներ կային: Բոլորն էլ գրիպ էին, բայց Նաջին ամենաառողջն էր:

Նրա մոր խոսքով՝ բժիշկները մի քանի անգամ հրաժարվել են հոսպիտալացնել իրեն իր 10 ամսական երեխայի հետ, ով բարձր ջերմաստիճան ուներ: Որդիներից երկուսի մոտ գրիպ էր: Նաջիի մոտ նման սուր ախտանիշներ չկային, սակայն փետրվարի 2-ին մայրը նրան հայտնաբերել է անգիտակից վիճակում: Բժիշկների խոսքով՝ տենդի կամ շնչառության դադարեցման պատճառով երեխայի մոտ նոպա է բռնկվել, որը հանգեցրել է ուղեղի անոքսիկ վնասման:

Նաջին մի քանի օր անցկացրել է կենսապահովման սարքում: Այդ ընթացքում նրա մայրը բուժման նպատակով հավաքել է մոտ 9 հազար դոլար: Փետրվարի 5-ին գրել է, որ տղան մահացել է, բայց շարունակել է գումար հավաքել՝ մյուս երեխաների բուժելու համար:

Դեղերի փոխարեն Նաջիին և նրա եղբայրներին բուժում էին անանուխի յուղով, իսկ խորհրդի համար մայրը դիմում էր «հակապատվաստայիններին»

Նաջիի ծնողները չեն պատասխանել՝ պատվաստե՞լ են երեխաներին, թե՞՝ ոչ: Երեխայի մահից 4 օր առաջ մայրը դիմել է ֆեյսբուքյան Stop Mandatory Vaccination խմբին՝ խորհրդի համար: Սա սոցցանցում «հակապատվասայինների» խոշոր հանրույթ է՝ բաղկացած 139 հազար անդամից: Հրապարակումն արդեն հեռացված է:

Կինը պատմել է, որ բժիշկն իր բոլոր երեխաների համար խորհուրդ է տվել «Տամիֆլյու»՝ հակավիրուսային հայտնի միջոց, բայց նա չի հետևել դեղատոմսին: Ոմանք «Տամիֆլյուն» վիճելի են համարում, քանի որ այն կարող է առաջացնել վտանգավոր հետևանքներ, օրինակ՝ ինքնախեղման դրսևորումներ: Բայց Նաջիի մայրը և խմբի այլ մասնակիցներ ընդհանրապես չեն դիտարկել դեղամիջոցը՝ որպես լուծում:

Նա գրել է, որ որդուն փորձել է բուժել անանուխի յուղով, վիտամին C-ով և լավանդով, բայց դա չի օգնել: 45 մեկնաբաններից ոչ ոք նրան խորհուրդ չի տվել բժշկության մեջ ապացուցված մեթոդներով: Փոխարենը՝ նրան պատմել են այլ «իրական դեղերի» մասին՝ կրծքի կաթի, ուրցի, շամբուկի: Մայրը որոշել է փորձել դրանք:

Facebook-ն արդեն խոստացել է լուծել սոցցանցի հակապատվաստումային շարժման հարցը

2019թ. սոցցանցը խոստացել էր հեռացնել պատվաստումների մասին կեղծ տեղեկությունները: Ֆեյսբուքում և Ինստագրամում շատացել էին հակապատվաստումային շարժումները, ինչը կարող էր Վաշինգտոն նահանգում կարմրուկի աճի պատճառ հանդիսանալ: ԱՄՆ կոնգրեսական Ադամ Շիֆն անձամբ էր դիմել Մարկ Ցուկերբերգին՝ խնդրելով ուշադրություն դարձնել «հակապատվաստներին»:

Հակապատվաստումային խմբերն իրականում հեռացվել էին նախընտրելիների ցանկից և որոնման արդյունքներից, ջնջվում էին նման կոչերով գովազդները: Բայց սոցցանցը դեռ շարունակում է հակապատվաստումայինների համար հարմարավետ միջավայր լինել:

Նաջիի մահվան մասին հրապարակումից հետո Facebook-ի ներկայացուցիչը կրկնել է, որ ընկերությունը կանի հնարավոր ամեն ինչ՝ ապատեղեկատվությունը նվազեցնելու համար: Հավելել է, որ դրա դեմ պայքարում են ամբողջ հարթակով, ներառյալ մասնավոր խմբերը:

Աղբյուր՝ shesht.am