Եղիր քո լավագույն տարբերակը՝ սա իմ զրուցակցի կարգախոսն է, իսկ զրուցակիցս մարքեթոլոգ Հենրի Համբարձումյանն է։

1.Գիտեմ, որ կրթություն ստացել եք արտերկրում։ Կխոսե՞ք այդ մասին։

Այո, սովորել եմ Գերմանիայում։ Պլաններ ունեմ վերապատրաստվելու արտերկրում, սակայն, ելնելով ամբողջ աշխարհում տիրող իրավիճակից՝ դեռևս այդ ամենը դադարեցված է։ Հուսամ, որ այս իրավիճակը կհաղթահարենք և հնարավորինս շուտ կմեկնեմ վերապատրաստման և կվերադառնամ հայրենիք։

2.Ինչու՞ ընտրել հենց մարքեթոլոգի մասնագիտությունը։

Շատ հետաքրքիր է եղել մասնագիտությանս ընտրությունը։ Սովորել եմ քոլեջում՝ կադաստրի բաժնում, ավարտել կարմիր դիպլոմով, երբ պիտի ընդունվեի համալսարան, հասկացա, որ չեմ ուզում շարունակել այդ բաժնում։ Մտերիմներս կվկայեն՝ ես սիրում եմ ուսումնասիրել տարբեր մասնագիտություններ և այդպես ուսումնասիրելով ինձ շատ հարազատ դարձավ մարքեթոլոգի մասնագիտությունը։ Մեկնեցի Գերմանիա, սովորեցի մարքեթինգ և PR։ Վերադարձա Հայաստան և ընդունվեցի ԵՊՏՀ մարքեթինգի բաժին, ի դեպ, ընդունելության քննությունները հանձնել եմ գերազանց։

3.Ո՞րն է ըստ Ձեզ մարքեթոլոգի գլխավոր առանձնահատկությունը։

Փորձեմ պատասխանել իմ օրինակով՝ եղել եմ այնպիսին ինչպիսին կամ, չեմ փորձել նմանվել ոչ մեկի։ Եթե փորձեք Google-ում որոնել մարքեթոլոգ կտեսնեք տարբեր մարդկանց, ովքեր անգամ խոսում են, թե ինչպես պետք է նկարվել, ինչպես ճիշտ խոսել։ Ես երբեք ոչնչի չեմ նայել, պարզապես եղել եմ այնպիսին ինչպիսին կամ։ Մարքեթինգը 21-րդ դարի մասնագիտություն է և կարծում եմ, որ մարքեթոլոգը պետք է իր անձը ցույց տա իր մասնագիտության մեջ։

4.Դուք ինքներդ մասնագիտական ինչպիսի՞ խնդիրների եք բախվել։

Ընկալման հետ երբեք խնդիրներ չեմ ունեցել։ Իրականում ես շնչում եմ մարքեթինգով։ Ավելի շատ բախվում եմ տեղի կոլեգաներիս հետ, որովհետև կրկին նշեմ՝ մարքեթինգը 21-րդ դարի մասնագիտություն է և պետք չէ մտածել սահմանափակ։ Բայց, կուզեի անպայման նշել, որ Հայաստանում շատ լավ մասնագետներ կան, որոնցից միշտ սովորելու բան ունենք։

5.Որպես մասնագետի նշեք այն հիմնական սխալները որոնք այսօր կան մեր շուկայում։

Ընկալման խնդիրը շատ մեծ է, երբ մարքեթինգը խորքային չեն ընկալում։ Նաև կարծում եմ, որ կրթության ոլորտը թույլ է։ Ես ամեն տեղ նշում եմ՝ եթե չլիներ իմ եվրոպական կրթությունը, ես չէի կարողանա հասնել այսօրվա իմ հաջողություններին։

6.Ի՞նչ հետևանքներ ու խնդիրներ առաջացրեց համաճարակը Ձեր բնագավառում։

Ոչ մի խնդիր, որովհետև սա նոր մարտահրավեր է մեր մասնագիտությանը։ Սա նոր մտածելակերպ է, նոր ուղղություն։ Պարզապես մենք պետք է ավելի շատ աշխատենք։ Կարծում եմ՝ ճգնաժամային այս իրավիճակը նոր ուղղություններ ու նոր հնարավորություններ կտա բիզնեսներին համաշխարհային շուկա դուրս գալու համար։

7.Հենրի, գիտեմ, որ վարում եք դասընթացներ։ Պատմեք թե ի՞նչ դասընթացներ են դրանք, ովքե՞ր կարող են դիմել Ձեզ։

2 դասընթաց է եղել, որոնցից առաջինը տևել է 4, երկրորդը՝ 9 օր։ Կարող են մասնակցել թե՛ մարքեթինգի կրթություն ստացած երիտասարդներ, թե՛ մասնագետներ։ Ինձ շատ է ուրախացնում այն, որ իմ դասընթացների տոմսերը գնում են հայտնի կազմակերպությունների հիմնադիրներ, հայտնի մարքեթոլոգներ։ Նաև ունեմ նորություն, արտակարգ դրության ավարտից հետո սկսելու եմ բարեգործական տուր Հայաստանում և Արցախում։ Տոմսերի ամբողջ հասույթը տրամադրվելու է անապահով ընտանիքներին։ Շատ շուտով այդ մասին կտեղեկացնեմ իմ ինստագրամյան էջում։

8.Իսկ չկա՞ն պլաններ հեռավար ուսուցում կատարելու։

Ցավոք ոչ, որովհետև ես աշխատում եմ մի քանի ընկերություններում որպես մարքեթինգի բաժնի ղեկավար և դասընթացները փորձում եմ համատեղել աշխատանքի հետ ու ժամանակ հեռավար ուսուցման համար այս պահին չունեմ։

9.Վերջում ի՞նչ խորհուրդ կտաք այն երիտասարդներին, ովքեր որոշել են իրենց ուղին շարունակել մարքեթինգի բնագավառում։

Ես միշտ խորհուրդ եմ տալիս իմ ուսանողներին լինել անսահման համբերատար, զգալ ժամանակի ռիթմը և միշտ աշխատել ինքնազարգացման վրա։