1.Ինչպե՞ս բացահայտեցիք ձեր ստեղծագործական տաղանդը:

▪︎Ես սկսել եմ ստեղծագործել չորրորդ֊հինգերորդ դասարաններից, բայց երբեք չեմ մտածել հետագա գրական ուղու կամ տաղանդի մասին։ Իմ ստեղծագործական տաղանդը բացահայտել է դասախոսներիցս մեկը։ Ուսանողական տարիներին բանաստեղծություն էի գրել և դասախոսներիցս մեկը, ով մասնագիտությամբ բանասեր է, ցանկացավ նայել և հրատարակել։ Նա արժանի համարեց, որ այդ գործս հանրայնանա։

2.Ի՞նչ գրական ուղղություններ ունեք և ո՞ր ուղղությամբ եք ամենից շատ ստեղծագործում։

▪︎Ես հիմնականում ստեղծագործում եմ պատմվածքի և էսսեի ժանրում, նաև ունեմ բանաստեղծություններ։ Եթե հաշվի առնենք առաջին երկու գրքերս, ապա էսսեի ժանրն ավելի հոգեհարազատ է։

3.Ի՞նչ նպատակ եք ունենում ստեղծագործելիս։

▪︎Յուրաքանչյուր ստեղծագործողի նպատակն է մարդուն դեպի բարին և լավը հասցնելը, որևէ արժեք փոխանցելը։ Ես ինքս ընթերցողին իմ ստեղծագործությամբ կարողանում եմ վերլուծելու, ինքն իրեն անդրադառնալու, մի պահ կյանքին ուրիշ աչքերով նայելու և իր իմացած բաները վերարժևորելու հնարավորություն տալ։

4.Հինգ գրքերից ո՞րը կամ որո՞նք են պատմում ձեր կյանքի մասին։

▪︎Ես կամ և չկամ իմ բոլոր գրքերում։ Այսինքն որպես հերոս ներկայացված չեմ, բայց բոլոր հերոսների մեջ կամ բոլոր հերոսների հետ այնպիսի իրադարձություններ են եղել, որոնք եղել են իմ կյանքում կամ իմ որևէ հոգեվիճակին համապատասխանել են։ Այսինքն ես կրել եմ իրենց մտածմումնքները կամ քայլերը։

5. Ի՞նչ ձեռքբռրումներ ունեք առ այսօր։

▪︎Իմ ձեռքբերումները չեն եղել մրցանակային, և ես չեմ էլ մտածել այդպիսի բաների մասին։ Միակ ձեռքբերումս այն է, որ հաջողվել է գրել թե ոճային, թե ասելիքով լի։ Քանի որ շատ մարդիկ իրենց հոգեհարազատ են համարում թե ձեռագիրը, թե մտքերս։

6. Մի փոքր պատմեք, թե ինչպե՞ս գրեցիք <<Արտագաղթած կարոտ>> գիրքը։

▪︎<<Նա և նրա>> գիրքը 2014 թվականին հրատարակվեց։ Հրատարակելուց հետո հասկացա, որ կիսատ է։ Այսինքն գրքի ֆորմատում ամփոփված ստեղծագործությունները ավելանալու տեղ ունեին։ Եվ այնպես եղավ, որ  կարծես օրգանական շարունակություն լինի։ Քանի որ <<Արտագաղթած կարոտ>> գիրքը հիմնականուն էսսեներից է կազմված։

7.Ինչպե՞ս եք ընտրել հերոսներին։

▪︎Իմ ստեղծագործություններում հերոսները հիմնականուն հավաքական կերպարներ են, թեպետ ունեցել են իրենց նախատիպերը։ Բայց բնականաբար ոչ այն ամբողջական տեսքով, ինչ ներկայացված են։ Միշտ կյանքն է տալիս հերոս կամ կյանքը խտացնում ես մի անձի կերպարի մեջ։ Օրինակ որեշ բնորոշիչ գծեր, հատկանիշներ, խառնվածք և այլն։ Հիմնականում հակադիր հերոսներ են։ Ես փորձել եմ դրանց միջոցով ցույց տալ, որ կյանքը և ընկալումը միանշանակ չեն։

8.Ո՞րն է ձեր ապրելու բանաձևը։

▪︎Բանաձևը մեկն է։ Կյանքը ապրել և փորձել ապրած կյանքի ընթացքում մի բան ստեղծել, օգուտ տալ։

9.Կա՞ արդյոք գիրք, որ որոշել եք հետագայում հրատարակել։ Եթե այո, ապա ինչի՞ մասին է լինելու։

▪︎Այս պահին գրում եմ վեպ։ Բավականին տարբեր բաների է վեպի բովանդակությունն անդրադառնալու, բայց չակերտները դեռ չեմ բացի։

10.Ի՞նչ կասեք ձեր ընթերցողներին և բոլոր նրանց ովքեր նոր են գրական աշխարհ մտնում։

▪︎Գրական աշխարհ մուտք գործողներին խորհուրդս և հորդորս, որ բացի ստեղծագործելուց նաև շատ գրքեր կարդան։ Ավելի լավ է շատ կարդալ քիչ գրել, քան քիչ կարդալ շատ գրել։ Ընթերցողներին միշտ մաղթում եմ բազմաթից գրքեր և բազմաթից գրքեր ունենալու հնարավորություններ։ Ցանկանում եմ, խնդրում և հորդորում, որ հարգեն և գնահատեն յուրաքանչյուր ստեղծագործողի և հրատարակչի աշխատանքը։ Քանի որ գրքի հրատարակմանը մի ամբողջ թիմ է մասնակցում։ Եվ գրողներին ու հրատարակիչներին օգնեն, որպեսզի անօրինականություններ չլինեն։ Մաղթում եմ այնպիսի գրքեր կարդան և գրքի այնպիսի խորհրդատուներ ունենան, որ յուրաքանչյուր ընթերցած գիրք իրենց կյանքում դրական փոփոխություններ բերի։