1.Ինչպե՞ս առաջացավ «Նուշ» հյուրատան բացման գաղափարը:

▪︎Այդ գաղափարը առաջացել է Ֆրանսիայում, երբ աշխատում էի այդտեղի տարբեր հատվածներում: Տեսնում էի, թե ինչպես է գյուղական համայնքը օգնում մարդկանց կենսամակարդակի բարձրացմանը և ինչպես է ազդում տնտեսական աճի վրա: Երբ վերադարձա Հայաստան, այդ ընթացքում կար այնպիսի շինություն, որի համար պարտադիր չէր մեծ գումար ծախսել: Որոշեցինք այս շինությունն օգտագործել ծրագիրն իրականացնելու նպատակով: Որը ոչ միայն կլինի բիզնես, այլ կլինի նաև սոցիալական ձեռնարկատիրություն: Կլինի մի այնպիսի տարածք, որտեղ կաշխատեն հենց գյուղացիները և կվճարվեն իրենց աշխատանքի դիմաց: Այս ամենը կլինի ընտանեկան բիզնես: Հենվելով այդ ամենի վրա հասկացանք, որ որակը ապահովված է: Քանի որ հիմնականում աշխատում ենք ես և իմ ընկերուհի Գայանեն, ով նույնպես «Նուշ»-ի հիմնադիրն է: Մենք աշխատում ենք որպես մատուցող, մայրս և կողքի հարևանը խոհարար են: Մենք միահամուռ ուժերով ենք աշխատում և վստահ ենք, որ կհաջողենք այս գործում:

2. Ինչու՞ որոշեցիք հենց Աշնակում  իրականացնել այդ  ծրագիրը:

▪︎Կային մի շարք պատճառներ Աշնակում իրականացնելու: Առաջինը, որ ինքս Աշնակից էի և ավելի լավ գիտեի, թե տարածքը, թե գյուղացիներին: Բացի դա վերլուծելով տարածաշրջանը հասկացանք, որ այս տարածաշրջանը ավելի հարմար է և մենք կարող ենք լինել առաջինը: Քանի որ Երեվան-Գյումրի ավտոճանապարհին չկա որևէ հարմար վայր, որտեղ զբոսաշրջիկները կարող են հանգստանալ և սնվել: Նույն խնդիրը նաև Վրաստանից գալուց է առաջանում: Վերլուծեցինք տարածաշրջանը բիզնեսի տեսանկյունից հասկացանք, որ այստեղ շատ կա դրա պահանջը: Սա մի քայլ էր, որով մենք պետության ուշադրությունը բևեռում ենք այս կողմ: Քանի որ շատ ծրագրեր են իրականացվում ՀՀ-ի տարբեր մարզերում, սակայն Արագածոտնի մարզի ակտիվությունը աչքի չի ըկել: Մենք որոշեցինք ստեղծել պահանջարկ, որ այդ ծրագրերի շրջանակներում բոլորն այցելեն: «Ֆերմերից ֆերմեր» ծրագիրն առաջինն էր, որ սկսեցին ուշադրություն դարձնել, թե մեզ, թե տարածաշրջանին:

3. Ինչու՞ ընտրեցիք <<Նուշ>> անվանումը։

▪︎Շատ երկար էինք մտածում անվան շուրջ։ Իրականում այստեղ շատ կային նշի ծառեր և բերքը շատ առատ է։ Նուշը, որպես ընդեղեն գրեթե կա բոլոր ազգերի խոհանոցներում, այսինքն իրենց ծանոթ է այդ համը։ Երբ <<Նուշ>>֊ը թարգմանվի իրենց լեզվով, մարդիկ կհասկանան ինչի մասին է խոսքը։ Գալով այստեղ զբոսաշրջիկները կտեսնեն նշի ծառեր, այդ պատճառով որոշեցինք անվանել <<Նուշ>>։ Զբոսաշրջիկները հեշտ են արտասանում և հեշտ հիշվող է։ Նաև հետագայում, որ ունենանք ապրանքանիշ(brand) և տարբերանշան(logo), կարող ենք գեղեցիկ երանգներ տալ։ Անցած տարի 20 նոր նշի ծառ ենք տնկել և ուզում ենք շատացնել: Հետագայում այգի ստեղծելու  և  նշի կարագ ստանալու ցանկություն ունենք:

4. Ո՞րն  էր առաջին  քայլն  այդ  ծրագրի իրականացման։

▪︎Առաջին քայլը գործընկերուհուս՝ Գայանեին, այստեղ բերելը և տարածքին ծանոթացնելն էր։ Որպեսզի ինքն էլ իր հավանությունը տար։ Երբ Գայանեն եկավ այստեղ, տեսավ տարածքը, որը շատ վատ վիճակում էր։ Քանդված էր ամեն ինչ և չկային այս ծառերը։ Հիմնականում ջրի խնդիր էր, այդ պատճառով այգին բարվոք վիճակում չէր։ Ես մտածեցի Գայանեն կասի ոչ, սակայն Գայանեն միացավ ինձ և համաձայնեց։ Նաև մյուս կարևոր քայլը ընտանիքի համաձայնությունն էր։ Ընտանիքիս անդամները ևս համաձայնեցին և մենք սկսեցինք  մեր  աշխատանքը։ Սկզբում  մեր  ընկերներից մեկը  ֆինանսական  հարցերով  աջակցեց  մեզ։

5.Քանի՞ տարի է ինչ գործում է «Նուշ»-ը:

▪︎Նուշը բացվել է 2019 թվականի հունիսի 16-ին: Այդ ժամանակ գործում էր ռեստորանը: Այս տարի՝ 2020-ի, մարտից էլ բացվել է հյուրատունը:

6.Որքա՞ն  հաճախ  և  ինչքա՞ն   զբոսաշրջիկ  է այցելում:

▪︎Անցած տարի  հունիսի 16-ին, երբ բացվեց, հաշվի առնելով այս տարածաշրջանը, թե ինչքան ոչ տուրիստական է: Մենք մինչ հոկտեմբերի 15-ին  300  զբոսաշրջիկ ենք ունեցել 12-13 երկրներից: Անցած տարի նաև  5 հոգի  Հայաստանից  ենք ունեցել: Իսկ այս տարի համաճարակի  շրջանակներում  օտարերկրյա  զբոսաշրջիկներ  չենք  ունեցել, բայց  մինչ այս պահը ունեցել ենք 100 ՀՀ  քաղաքացի:

7.Ինչպիսի՞ ձեռքբերումներ եք ունեցել առ այսօր:

▪︎Առ այսօր ֆինանսական ձեռքբերումներ չեն եղել, քանի որ  միանգամից  ֆինանսական  մեծ  կարողություն  ձեռք բերել  անկարող ենք, սա է բիզնեսի  օրենքը: Ձեռքբերումների մեջ  մեր  գաղափարը  մնաց:  Մեր գաղափարը սկսեցին կիսել  գյուղի մարդիկ, մեր ընտանիքի անդամները  և  սկսեցին մեզ աջակցել ու հավատալ: Ձեռքբերումների  մեջ էր նաև բոլոր  մարդկանց  գոհունակությունը,  որ գալով այստեղ բացի «Նուշ»-ից  նաև  հիանում էին մեր գյուղով: Մենք շատ  կարևորում ենք  գյուղի գովազդը: Նաև  որ  կարողանում ենք համայնքին օգնել, դա  ևս  մեր  ամենամեծ  նվաճումներն են այս պահի դրությամբ:

8.Արդյո՞ք  այս  ամենը  ձեր  պատկերացրածի  նման  է:

▪︎Ես ավելի հսկայածավալ ծրագրեր էի պատկերացնում, բայց  սեփական փորձից  հասկանալի է, որ այդ ամենը ժամանակ  և  ռեսուրս է պահանջում:  Հիմնականում ստացել ենք  այն, ինչ ցանկացել ենք, իսկ ռեսուրսները  որքան թույլատրել են:

9.Որտեղի՞ց են ամենաշատ զբոսաշրջիկներ գալիս։

▪︎Ամենաշատ զբոսաշրջիկները ֆրանսախոս երկրներից են գալիս։ Գալիս են Շվեյցարիայից, հիմնականում՝ ֆրանսախոս մասերից, Ֆրանսիայից, Բելգիայից։ Նաև ունեցել ենք զբոսաշրջիկներ Արաբական Էմիրություններից, Իրանից, Իտալիայից՝ 50 հոգի, և շատ այլ տեղերից։

10.Եվ վերջում, մի փոքր պատմեք իրենց տպավորությունների մասին։

▪︎Այս պահի դրությամբ չունենք ոչ մի դժգոհում։ Մեր խոհանոցը շատ են սիրում և ավելի շատ այգուց օգտվել են սիրում, քանի որ թույլ ենք տալիս։ Չինացի զբոսաշրջիկները զարմացած են այգուց։ Մենք իրենց ազատ ենք թողնում և ասում, որ կարող եք օգտվել այգու բարիքներից։ Քիչ է լինում, երբ փչացնում են։ Հիմնականում գալիս խնդրում են, որ բերքը իրենք հավաքեն։ Նաև տուռօպերատորները մեզ հետ մեծ սիրով աշխատում են։ Եթե զբոսաշրջիկն իրենց խմբի հետ այստեղ գալով գոհ է մնում, իրենք իրենց գնալուց հետո մեզ հետ շարունակում են աշխատել։