Գույներ և հույզեր. Ինչպե՞ս աշխատել հույզերի հետ
Գույները և հույզերը. հույզերի հետ աշխատանքի մի քանի տարբերակ
Գույները և զգացմունքները սերտորեն կապված են միմյանց հետ: Գույնը ազդում է մեր հոգեվիճակի, տրամադրության, զգացմունքների վրա :Նաև մեր տրամադրությունը , ընդհանուր հուզական վիճակը կարող են պայմանավորել մեր ձգտումը դեպի այս կամ այն գույնը:
Այսօր կներկայացնեմ արտթերապևտիկ 3 տեխնիկաներ,որոնք ուղղված են հույզերի գիտակցման բարձրացմանը և որոնք կարելի է իրականացնել թե՛ երեխաների ,թե՛ մեծերի հետ: Դրանք կարելի է իրականացնել ցանկացած արտ նյութերով՝ մատիտներ, յուղամատիտներ,չոր պաստելներ, ջրաներկ, գուաշ, ակրիլիկ: Ընտրեք այն նյութը ,որը Ձեզ առավել հարմար է :Իսկ եթե աշխատում եք այցելուի հետ, ապա ճշտեք նրանից,թե ինչ նյութով կուզի աշխատել:
Ստորև ներկայացնում եմ հույզերի հետ աշխատանքի երեք արտթերապևտիկ միջոցները.
Տարբերակ 1․ Նկարչություն՝ ուղղված հույզերի գիտակցման բարձրացմանը
Ընթացքը
Թղթին գրի առեք այն բոլոր հույզերը,որոնք հաճախ ունենում եք/կարող եք գրի առնել վերջին շաբաթվա ընթացքում ունեցած հույզերը/: Այնուհետև յուրաքանչյուր հույզի համար ընտրեք մի գույն:
Թղթին նկարեք այդ գույներով աբստրակտ մի պատկեր: Օգտագործեք գույները ըստ հույզերի ապրման հաճախականության: Ենթադրենք, դեղինով նշել եք ուրախությունը և եթե ուրախությունը գերիշխում է Ձեր հույզերի մեջ, ապա դեղին գույնը համապատասխանաբար շատ պետք է լինի նկարում: Սակայն ողջ թուղթը ներկելը կարող է հոգնեցնող լինել: Այդ դեպքում ավելի նպատակահարմար է այցելուին առաջարկել հույզերի գույներով ներկել որևէ պատկեր ,օրինակ սիրտ կամ շրջան : Սա ավելի հեշտացնում է գործը և ավելի ցայտուն կարող է ցույց տալ մարդու հուզական վիճակը: Նաև շրջանի մեջ հույզերը նկարելը հանգստացնող ազդեցություն կարող է ունենալ զայրույթի ժամանակ, հատկապես երեխաների հետ :
Նկարելուց հետո անպայման քննարկեք պատկերված հույզերը, դրանց հաճախականությունը: Արդյոք կա ցանկություն որևէ բան փոխելու, որևէ հույզ ուժեղացնելու կամ պակասեցնելու:Մտածեք ՝ ինչ կարելի է անել դրա համար:
Եթե այս տեխնիկան անում եք այցելուի հետ, ապա նպատակահարմար է այն կիրառել թերապիայի սկզբում որպես այցելուի հուզական վիճակի գնահատման միջոց: Եվ թերապիայի ավելի ուշ փուլերում փոփոխությունները տեսնելու համար:
Տարբերակ 2․ Նկարչություն՝ ուղղված հույզերի արտահայտմանը այստեղ և հիմա
Ընթացքը
Առանց սիմվոլներ և բառեր կիրառելու պատկերեք գույներով Ձեր հոգեվիճակը այս պահին: Նկարեք տարբեր գույներով,որոնք կարտահայտեն Ձեր ներկայիս հույզերը:
Այստեղ ևս կարող եք կիրառել շրջանը: Այսինքն՝ թղթին շրջան պատկերեք , այնուհետև նկարեք դրա մեջ: Սա լավ միջոց է արտահայտելու և հաղթահարելու բացասական հույզերը:
Տարբերակ 3․ Նկարչություն՝ ուղղված մարմնի և հույզերի կապի գիտակցմանը
Ընթացքը
Թղթին գրի առեք այն բոլոր հույզերը,որոնք հաճախ ունենում եք: Այնուհետև յուրաքանչյուր հույզի համար ընտրեք մի գույն:
Մտածեք յուրաքանչյուր հույզի մասին, ե՞րբ եք վերջին անգամ զգացել, ի՞նչ է կատարվել Ձեր մարմնում:
Թղթին մարդու ուրվանկար պատկերեք և հույզերը իրենց համապատասխան գույներով «տեղադրեք» ուրվանկարի մեջ:
