Աշխարհում ամեն մարդ պետք է կյանքում գոնե մեկ անգամ հոտնկայս ծափահարությունների արժանանա, քանզի մենք բոլորս հաղթահարում ենք այս աշխարհը։

<<Հրաշքը>> ամերիկացի գրող Ռաքել Պալացիոյի առաջին վեպն է։Այս գիրքը միշտ առանձնացնում եմ, քանի որ այնքան բան կա սովորելու ընդամենը հինգերորդ դասարանում սովորող Օգյուստից։Եվ առհասարակ, յուրաքանչյուր կերպար երկար ժամանակ մնում է հիշողությանդ մեջ։Պալացիոն սա գրել է մի հուզիչ միջադեպից հետո, որին ինքն ականատես է եղել․ իր որդին տեսնելով դիմածնոտային խնդիրներով մի աղջկա՝ սարսափում է, որի պատճառով աղջիկն ու իր ընտանիքի անդամները կարող էին վատ վիճակի մեջ ընկնել, նա շտկել է իրավիճակը՝ տղային հեռացնելով դեպքի վայրից:«Հրաշքը» գիրքը պատմում է խիստ արտահայտված դիմային արատներ ունեցող և երկար տարիներ  տնային ուսուցում անցած մի տղայի ու դպրոցում նրա ունեցած դժվարությունների մասին:

Այս գիրքը Հայաստանում մեծ տարածում գտավ ԱՄՆ դեսպանատան կողմից իրականացվող «Կյանքը լի է հրաշքներով ծրագրի շրջանակում։Նպատակը Հայաստանի պատանիների հետ սոցիալական ներառման ու հաշմանդամության հետ կապված հարցերի շուրջ երկխոսության ծավալումն է: Նույնանուն վեպի հիման վրա նկարահանվել է ֆիլմ։Ե՛վ ֆիլմը, և՛ գիրքը աննկարագրելի հրաշալի է ստացվել։Կարդացվում է մեկ շնչով ,և′ տրամադրություն է բարձրացնում, և′ ծիծաղեցնում է, և′ հուզում։

Տարբեր կողմերից բժիշկներ եկան

Եկան, տեսնեն ինձ

Կանգնեն մահճիս մոտ

Ու չհավատան իրենց աչքերին:

Ասին, երևի հրաշք է երկնային

Աստծո ձեռքի գործ ու արարչություն

Բայց ինչ էլ որ տեսան, ինչ էլ ասացին

նրանք չտվին բացատրություն:

Սա ուղղակի հրաշալի ներկայացնում է այն գաղափարը, թե ինչպես ես հոգիդ բացում այն մարդկանց առաջ, որոնք տարբերվում են քեզանից:Նա սովորական երեխա է , արտասովոր արտաքինով։Եվ այդ արտաքինի պատճառով նա իրեն չի կարողանում ներկայացնել, թեպետ շատ ավելի խորը ներաշխարհ ունեցող երեխա է։

Մարդու արտաքինը ոչ մի նշանակություն չունի, և այն ոչ մեկը ի զորու չէ վերաափոխել, սակայն կարելի է վերափոխել արտաքինի հանդեպ ունեցած վերաբերմունքը:

Սա պատմում է մի տղայի մասին, ով հազարավոր վիրահատություններ է տարել, երկար ժամանակ իր ուսուցիչը մայրն է եղել, և ահա գալիս է ժամանակը նրան հասարակության մեջ ավելի վստահ դարձնելու պահը։Նա սկսում է հաճախել դպրոց, որտեղ էլ սկսվում են նրա համար ամենադժվար ժամանակները։Շատ երեխաներ տեսնում են նրա մեջ այն հզոր ուժը, ցանկանում են ընկերանալ, բայց հասարակության մեջ ձևավորված կարծրատիպը նրանց ետ է պահում։

Այս գիրքը, ֆիլմը ամբողջությամբ փոխում են աշխարհայացքը , ներաշխարհը բարությամբ ու սիրով լցնում։

Ցանկանում եմ ներկայացնել այն հզոր խոսքերը,որոնք իր հերոսների նման ուժեղ են ։

• Եթե կա ընտրություն` լինել ճիշտ կամ լինել բարի, ընտրիր բարին:

• Երբեմն լավ է սկսել նորից:Երբեմն մտածում եմ,որ գլուխս շատ մեծ է,որովհետև մեջը լիքը երազանքներ են։

• Եթե կյանքում իրոք ինչ-որ բան ես ուզում, պետք է աշխատես:

• Ճակատագիրը ժպտում է խիզախներին:

• Բավական չէ լինել ընկերական: Հարկավոր է ընկեր լինել:

Օգին սովորական երեխա է՝ արտասովոր դեմքով: Բայց կարո՞ղ է արդյոք նա համոզել իր նոր դասընկերներին, որ չնայած արտաքինին, ինքն էլ նրանց պես սովորական երեխա է:Եվ այո , նա կարողանում է ։

                                                           Գնա օրվա հետևից և ձգտիր արևին:

Ֆիլմի հայերեն տարբերակը կարող եք դիտել  այստեղ

Գիրքը կարող եք ներբեռնել այստեղ

Հեղինակ՝ Ասյա Գևորգյան