Կոտայքի մարզի Չարենցավան քաղաքում շինարարական աշխատանքներով զբաղվող «Աշոտ և Հայկ եղբայրներ» ՍՊԸ հիմնադիր  Գևորգ Պրազյանը և իր գործընկերները ցանկանում են հիմնել թղթի, դեսպեի, լամինատի, մանրաթելային նրբատախտակի արտադրություն։ Սպասվող հազար աշխատատեղերի, կատարվելիք աշխատանքների և սպասվող զարգացումների շուրջ զրուցել եմ  Գևորգ Պրազյանի հետ:

Գևորգ, բավական յուրահատուկ  ծրագիր եք հղացրել` թղթի արտադրամասից  մինչև սահմանապահ շների բուծում. Պատմեք ծրագրի մասին:

Նախ նշեմ, որ գաղափարը նոր չէ, մեր թիմով արդեն 7 տարի է քննարկում ենք: Քանի որ բնակվում էի Լեհաստանում, վերադարձա Հայաստան, որովհետև անպայման ուզում եմ, որ այս գաղափարը իրականություն դառնա Հայաստանում:

Ֆինանսավորման առաջարկ եղել է Ռուսաստանից, ու քանի որ ֆինանսավորողը ռուս էր, իր պայմանն էր, որպեսզի գաղափարը իրականություն դառնա Ռուսաստանում: Իհարկե, Ռուսաստանը մեծ ռեսուրսներ ունի, զարգացած գործարանային ոլորտ, բայց ես չցանկացա:

Այսօր տեսանելի է, որ մեր շուկան ունի նման արտադրության` թղթի, լամինատի պահանջարկը ու մոտավոր կարող եմ ասել, որ այս արտադրանքի գրեթե 70 տոկոսը բերվում է Թուրքիայից, իսկ Հայաստանում նման արտադրություն չկա: Նաև նշեմ, որ գաղափարը ներկայացրել ենք էկոնոմիկայի նախարարություն և այս պահին քննարկման փուլում է: Հավելեմ, որ մեր շահույթի հաշվին պատրաստվում ենք զբաղվել սահմանապահ խելացի շների բուծման աշխատանքներով,  անօդաչու թռչող սարքերի, օդային պաշտպանության զենքերի արտադրմամբ: Իհարկե այս ամենը իրականացնելու համար պետք է գումար, իսկ գումար պետք է ստեղծենք մենք: Կյանքի կոչելով այս ծրագիրը մենք կունենանք հազար նոր աշխատատեղ, որը փոքր թիվ չէ:

Որոնք են այն առաջնահերթ խնդիրները, որոնք պետք է հաղթահարել, գաղափարը կյանքի կոչելու համար:

Ես դրսում ունեմ գործարար կապեր, ու մինչև կառավարությանը գաղափարի ներկայացնելը, ծանոթացել եմ բոլոր դետալներին` հաստիքների ստեղծումից մինչև անհրաժեշտ գործիքների պատրաստում: Անպայման կուզեի շեշտել, որ մենք կարող ենք մշակել ցանկացած տեսակի փայտ և մենք որպես հումք ունենալու ենք ծառերի էտումից մնացած ճյուղեր, այսինքն մենք հավաքելու ենք ծառերի էտումից առաջացած թափոնները և դրանք վերածենք արտադրանքի: Նաև եթե ունենանք հումքի պակաս կան ռուսական կազմակերպություններ, որոնք պատրաստ են փայտը մատակարարելու, ինչպես նաև պատրաստ են մեզ տրամադրել մասնագետներ, ովքեր կզբաղվեն հայ մասնագետների ուսուցմամբ:

Այս գաղափարի իրականացման համար մեզ անհրաժեշտ է ընդհամենը 10մլն. դոլլար: Եթե հաշվի առնենք մեր պլանավորած աշխատանքները և հազար նոր աշխատատեղի ստեղծումը , ապա դա չնչին գումար է:  Ցավոք նման ապրանքի համար մեծ գումար է դուրս գալիս արտերկիր , իսկ մենք ցանկանում ենք այս ներդրումները կատարել մեր երկրում:

Գիտեմ, որ մինչ այս գաղափարը ունեցել եք բավական մեծ հաջողություններ և ձեռքբերումներ, կուզեի մի փոքր էլ խոսել այդ մասին:

Իրականում, ես ինչի հասել եմ` հասել եմ իմ ուժերով: Ստեղծել եմ իմ շինարարական կազմակերպությունը, մասնակցել ենք պետական մրցույթների, ունենք պատվոգրեր, շնորհակալագրեր: Ես չեմ ցանկացել ապրել այլ երկրում ու այն հաջողություններին, որ հասել եմ Հայաստանում, օրինակ Լեհաստանում ես կարող էի դրա տասնապատիկին հասնել: Բայց հայրենի հողն ու տունը ինձ հետ էր կանչում ու  ես  իմ գլխավոր հաջողությունը համարում եմ հենց դա` ներկայացնել և իրականացնել գաղափարներ հայրենիքում: Հաջողության գրավականը ինձ համար շքեղության ու նյութական արժեքներում չէ ես կարողանում եմ պարզ ճակատով քայլել փողոցում և ունեմ ընկերներ, որը  մարդու ամենամեծ ձեռքբերումն է:

Քըրք Քըրքորյանը մի դիպվածով ասել է` բիզնեսում իրատեսությունն արդեն իսկ լավատեսություն է…

Գիտեք… Հարաբերական է, մի խոսք էլ կա` «եթե խելք ունես` ինչի ես աղքատ» , բայց ամեն ինչ հարաբերական է:

Միշտ չէ, որ ստեղծվում են հնարավորություններ, միշտ չէ, որ լինում է գաղափարի լուսաբանում: Այսօր մենք ունենք խելացի երիտասարդներ, ովքեր ունեն լավ գաղափարներ ու դրանք պարզապես մնում են թղթի վրա: Մեր նպատակը հենց դա է` մեր գաղափարը իրականանալու դեպքում, մենք հրավիրելու ենք ոլորտի բոլոր խելացի մարդկանց, ովքեր կցանկանան մեզ հետ համագործակցել, իրենց գաղափարները բարձրաձայնել: Ես կարծում եմ, որ գաղափարը ամենամեծ զենքն է, որը պետք է անպայման իրագործել:

Ձեզ նույնպես կարող է դուր գալ