Գևորգ Գրիգորյան – “Անկեղծ ասած”
Անկեղծ ասած էլ ոչինչ չկա կյանքում անկեղծ, նույնիսկ մարդիկ երկերեսանի են դարձել, վերացել է ասես անկեղծությունը աշխարհի վրայից։ Բայց անկեղծ ասած սիրում եմ կյանքը իր բոլոր թերություններով, բարդություններով ու փորձություններով։ Փողոցներն անգամ դատարկ են թվում, անկեղծ ասած մարդիկ ասես իրարից են փախչում։ Ու աշխարհն է փախչում մարդուց։ Հարգում եմ այն մարդուն, ով անկեղծ է խոսում, ով սրտի խորքում ոչ մի սուտ չի պահում։ Հոգնել կարելի է կեղծիքից ու կեղծավոր դեմքերից։ Ատում եմ կեղծավորությունը, ինքս էլ միշտ փորձում եմ լինել անկեղծ ու ատում եմ սուտը։ Ավաղ կյանքն այնքան է լցված ստով ու կեղծիքով, որ ժամանակ առ ժամանակ նույնիսկ սուտը կյանքեր է փրկում։ Եթե փորձեմ անկեղծ լինել, անկեղծ ասած ոչինչ չկա ասելու, այո սիրում եմ կյանքը, սիրում եմ աշխարհին իմ աչքերով նայել ու իմ աշխարհի մեջ ապրել։ Անկեղծ ասած այդ աշխարհն այնքան գեղեցիկ է, որ արբել կարելի է, իսկ մեր աշխարհում միայն գլխապտույտ է առաջանում։ Անկեղծ ասած կյանքը եթե լիներ հարթ ու հանգիստ մարդու ապրելն անիմաստ կլիներ, քանի որ մարդը ձգտում չէր ունենա, չէ որ նույնիսկ Աստված մարդուն ոչ կատարյալ է ստեղծել, որպեսզի մարդը ձգտի կատարելության։ Անկեղծ ասած գուցե աշխարհն էլ չփոխվի բայց յուրաքանչյուրդ փորձեք փոխվել յուրովի և ինքներդ փորձեք ասել անկեղծ ասած…
