Ռոբոտ֊հավաքարարներ։ Ինչպես են նրանք աշխատում և օգնում կորոնավիրուսի դեմ պայքարում
Մարդիկ ռոբոտներ օգտագործում են արդեն մի քանի տասնամյակ, բայց մենք հազվադեպ ենք տեսնում նրանց առօրյա կյանքում: Ամենից հաճախ նրանք հավաքում են մեքենաներ կամ կատարում են այլ գործողություններ ծանր արդյունաբերության մեջ: Եթե նույնիսկ ռոբոտները հայտնվում են սպասարկման ոլորտում, դրանք հիմնականում օգտագործվում են ուշադրություն գրավելու և wow էֆեկտ ստեղծելու համար – վառ օրինակ է աշխարհում առաջին ռոբոտացված հյուրանոցը Ճապոնիայում:
Այնուամենայնիվ, համաճարակի ընթացքում պարզվեց, որ ռոբոտների՝ մարդկանց փոխարեն պարզ գործողություններ կատարելու ունակությունը շատ պահանջված է:
Դեռևս մարտ ամսին, UVD Robotics-ի գլխավոր տնօրեն Պեր Ուիլ Նիլսենը ասաց, որ կորոնավիրուսը մեծացրել է ռոբոտ֊հավաքարարների պահանջարկը, որոնք իրականացնում են խորը մակերևույթների մաքրում՝ օգտագործելով ուլտրամանուշակագույն ճառագայթում:
Ուլտրամանուշակագույնը որակապես ախտահանում է տարածքը, բայց վտանգավոր է մարդու համար: Ձայնի ղեկավարման համակարգով ինքնուրույն տեղաշարժվող մեխանիզմը հիանալի կերպով փոխարինում է մարդկանց այս առաջադրանքի կատարման ընթացքում:
Ի սկզբանե, հատակների մաքրման ռոբոտները ստեղծվել էին հիվանդանոցների և այլ բժշկական հաստատությունների համար, որտեղ հատկապես մեծ է վիրուսի տարածման վտանգը: Այժմ դրանք հաճախ պատվիրվում են առևտրային կազմակերպությունների կողմից, որոնք ձգտում են ապահովել մաքրություն։
Սինգապուրում, որտեղ հատկապես հայտնի են ժամանակակից ռոբոտաշինության նվաճումները, առևտրի կենտրոնների Frasers Properties ցանցը օգտագործում է նմանատիպ սարքեր: Ուլտրամանուշակագույն ռոբոտները գիշերային ժամերին մաքրում են սենյակները` առևտրի կետերը բացելիս հաճախորդների և անձնակազմի անվտանգության ապահովման համար: Սինգապուրյան Northpoint City-ը պլանավորում է առաջինը պատվիրել Sunburst ուլտրամանուշակագույն ռոբոտները PBA Group ընկերությունից, ավելի ուշ՝ այդպիսի սարքեր կհայտնվեն ևս 13 կազմակերպություններում ամբողջ քաղաքով:
«Մեզ համար շատ կարևոր է ապահովել մեր աշխատակիցների, վարձակալների և հաճախորդների առողջությունն ու անվտանգությունը COVID-19 համաճարակի ընթացքում», – ասում է Frasers Property Retail գործադիր տնօրեն Լո Չի Վահը: «AMR-ի (ինքնավար շարժական ռոբոտների) օգտագործումը առևտրի կենտրոններում մեզ թույլ կտա բարձրացնել աշխատողների անվտանգությունը և ազատել նրանց մաքրման ծանր աշխատանքներ կատարելուց:
PBA Group ղեկավար Դերիք Յապը կարծում է, որ ռոբոտները կարող են «վտանգավոր, ձանձրալի և կեղտոտ աշխատանք կատարել»: Այս տեսակետը արտացոլում է ներկայիս պայմաններում ռոբոտների կոմերցիոն օգտագործման հիմնական ակնկալիքները:
«Այս աշխատանքը վտանգավոր է մարդու համար, ուլտրամանուշակագույն լույսը հնարավոր չէ օգտագործել, եթե սենյակում մարդիկ կան», – բացատրում է Յապը՝ նկատի ունենալով ախտահանող ճառագայթումը: Ժամանակակից ռոբոտները անջատում են ուլտրամանուշակագույն ճառագայթումը, եթե նրանք մոտակա տարածքում նկատում են մարդու:
«Բացի այդ, դա ձանձրալի աշխատանք է` գործողությունների անընդհատ կրկնելիության պատճառով և կեղտոտ է COVID-19-ի պատճառով», – ավելացնում է նա:
Ռոբոտը, որը բաղկացած է մի քանի լյումինեսցենտ լամպերից շարժվող բազայի վրա, ինքնուրույն կմաքրի սենյակը և ավտոմատ կերպով կլիցքավորվի գործընթացի ավարտից հետո. մարդուն պետք է միայն ծրագրավորել նրա երթուղին:
Հատակների մաքրումը վիրուսի դեմ պայքարում ռոբոտների օգտագործման ընդամենը մեկ տարբերակ է: Իսրայելական Robotemi ստարտափը ստեղծել է Temi օգնական ռոբոտը, որը հագեցած է ջերմաչափով և ջերմային խցիկով: Այն օգտագործվում է Ասիայի հարյուրավոր հիվանդանոցներում, բժշկական կենտրոններում, ծերանոցներում և կորպորատիվ շենքերում: Ռոբոտը նույնիսկ լվացարան ունի, որպեսզի մարդիկ կարողանան ձեռքերը լվանալ:
Robotemi գործադիր տնօրեն Գալ Գորենը հայտարարել է. «Այժմ Չինաստանում աշխատողը պետք է չափի ջերմությունը, նախքան գրասենյակ մուտք գործելը: Temi նրան դիմավորում է առջևի դռան մոտ »:
Չինական Meituan Dianping ծրագիրը ռոբոտներ է օգտագործել Պեկինում անհպում առաքման համար` համաճարակի ընթացքում: Այս ռոբոտը ունակ է տեղափոխել մինչև 100 կգ ապրանք: Մեկ երթի ընթացքում նա երեքից հինգ պատվեր էր առաքում մարդկանց, ովքեր կարանտինի պատճառով տանն էին մնացել:
