Տորթ «Էսկիմո»

Բաղադրամասեր

Խմորի համար

1. Ալյուր – 1 բաժակ
2. Շաքարավազ – 1 բաժակ
3. Ձու – 4 հատ
4. Սառը ջուր – 10 ճ/գ
5. Կակաո – 2 ճ/գ
6. Սոդա – 1/2 թ/գ
7. Վանիլին – 1 թ/գ

Կրեմի համար

1. Տաք կաթ – 1 բաժակ
2. Ձու – 2 հատ
3. Շաքարավազ- 1 բաժակ
4. Ալյուր – 3 ճ/գ
5. Վանիլին
6. Կարագ – 250 գ

Ջնարակի համար

1. Շաքարավազ – 2 ճ/գ
2. Կակաո – 2 ճ/գ
3. Թթվասեր – 2 ճ/գ
4. Կարագ – 50 գ

Պատրաստման եղանակը

• Ձվերի սպիտակուցները դեղնուցներից առանձնացնել և հարել սպիտակուցները:
• Դեղնուցները՝ մեկ բաժակ շաքարավազի հետ միասին հարել՝ մինչև սպիտակելը:
• Ավելացնել սոդան, սառը ջուրը, վանիլինը, կակաոն, դանդաղ խառնելով՝ ավելացնել հարած սպիտակուցը:
• Խառնելով աստիճանաբար ավելացնել ալյուրը:
• Կաղապարը պատել կարագով, լցնել խմորը, հարթեցնել:
• Ջեռոցը տաքացնել մինչև 180 աստիճան և մոտ 30-40 րոպե թխել:

Խմորը թողնում ենք եփվի, անցնենք կրեմի պատրաստմանը:

• Թասի մեջ խառնել 2 ձուն, շաքարավազը և ալյուրը, լավ հարել:
• Ավելացնել տաք կաթը, խառնել, այնուհետև դնել ցածր կրակի վրա:
• Անընդհատ խառնելով՝ հասցնել եռման, թողնել 1 րոպե և վերցնել կրակից: Սառեցնել:
• Հարել փափկեցրած կարագը վանիլինի հետ: Հարելով՝ գդալ-գդալ ավելացնել եփած, սառած զանգվածը:

Պատրաստենք ջնարակը:

• Կակաոն և թթվասերը խառնել, այնուհետև ավելացնել շաքարավազը:
• Դնել կրակին և անընդհատ խառնելով՝ եփել մինչև եռալը:
• Վերցնել կրակից և ավելացնել կարագը, լավ խառնել, որպեսզի ստացվի փայլուն, հարթ զանգված, հետո՝ սառեցնել:

Արդեն սառած խմորի շերտը պատել ստացված կրեմով, հարթեցնել և դնել սառնարանը մոտ 30 րոպե: Սառնարանից հանելուց հետո վրան լցնել ջնարակը, հարթեցնել և նորից դնել սառնարանը:

Բարի ախորժակ…