Դրախտիկը  գյուղ է  Գեղարքունիքի մարզում, Արեգունի լեռների հարավային լանջին, Սևանա լճի ավազանի Դրախտիկ գետի ափին, մարզկենտրոնից 61 կմ հյուսիս-արևելք:  Բնակավայրը գտնվում է ծովի մակերևույթից 1980 մետր բարձրության վրա։


Պատմություն

Դրախտիկի  պատմությունը  սկսվում է  անհիշելի ժամանակներից:   Այն  ժամանակ  գյուղը  այս  նույն  անվամբ  գտնվում  էր Մեծ Հայքի Սյունիք աշխարհի Սոթք գավառում: Ժամանակի փոփոխման  հետ  փոխվել  է նաև  գյուղը: Սակայն  արժեքավոր է  այն,  որ չնայած տարբեր  արհավիրքներ են  անցել,  բայց  գյուղը  պահպանել է  իր  գոյությունը:

Գյուղի  բնակչության թվի վերաբերյալ  արձանագրություններ  կան  դեռևս  19-րդ  դարից: Ըստ 1897թ.  մարդահամարի, գյուղի բնակչության  թիվը  հասնում  էր  935-ի: Հետագա  տարիների ընթացքում  գյուղը  բնակեցվել  է  ադրբեջանցիներով:  1988-1992թթ. այնտեղ  բնակություն  են  հաստատել  Արծվաշենից գաղթած  հայեր: 2004թ.  մարդահամարի համաձայն  գյուղի  բնակչության  թիվը  հասնում  է  871-ի:


Տնտեսություն

Դրախտիկի  տնտեսությունը  կարելի  է  բաժանել  գյուղատնտեսական  և  սպասարկող  ճյուղերի: Դրախտիկում  գյուղատնտեսության ճյուղերից  առավել զարգացած  են անասնապահությունը, բանջարաբուծությունը  և հացահատիկի  մշակումը,  ինչը  հետևանք է  գյուղի  բարձրլեռնային  ռելիեֆի:  Սակայն  գյուղում  վերջին  տարիներին զարգանում  է  ՀՀ  գյուղերին  ոչ բնորոշ  զբոսաշրջությունը.  ամեն  տարի  էլ  ավելի  շատ  զբոսաշրջիկներ  են  այցելում   գյուղ: Իսկ  պատճառներին  կարող  եք  ծանոթանալ  ստորև:


Պատմամշակութային կոթողներ

Դրախտիկի տարածքում  հայտնաբերվել են հին  եկեղեցու  ավերակներ,   խաչքարեր, ինչպես  նաև  հին  գերեզմանոց:  Այս բոլոր  կոթողները  թվագրվում  են 15-19-րդ  դարերով:

Խաչքարերը  կարող  եք  տեսնել  Դրախտիկից  Կալավան  երթուղու  վրա:


Բնական  հուշարձաններ

Գյուղի  բնական  հուշարձանները հմայում  են  իրենց շքեղությամբ:

Արեգունի լեռներ

Արեգունի  լեռները  տարածվում  են Գեղարքունիքի  և Տավուշի  մարզերում: Դրախտիկի  մոտակայքում  գտնվում  է  Պուտաքարը,  որ  լեռնաշղթայի  ամենաբարձր  լեռներից  է: Բացի  այդ  Կարկտասար  տանող  ճանապարհը   ևս  անցնում  է  Դրախտիկի   միջով: Դրախտիկի  մոտ  գտնվող  լեռները  հայտնի  են  նրանով,  որ  այստեղ աճում է 1000+1  ծաղիկ: Ինչպես  նաև այստեղ է  գտնվում Թթու  ջուր  կոչվող  աղբյուրը, որից  բնական  հանքային  ջուր  է  հոսում:

Դրախտիկ  գետ

Գյուղի  տարածքով  է  հոսում  Դրախտիկ  գետը,  որը  սկիզբ  է առնում Արեգունի լեռնաշղթայի Պուտաքար գագաթից և  թափվում  Սևանա լիճ:  Երկարությունը 11,3 կմ է:

Սևանա լիճ

Դրախտիկի մասին խոսել  և  չխոսել  Սևանա  լճի  ու  Դրախտիկի  հանրային  ափի  մասին,  անհնար  է:  Պարզապես  հիասքանչ ժամանցի  վայր  է Դրախտիկի  հանրային ափը, որի  սևանաբաժինը շլացուցիչ  է:

Ի դեպ, 2019թ.  Դրախտիկի  հանրային ափը, շնորհիվ «Երազանքի գյուղ» նախագծի  և  գյուղի  երեխաների,  ճանաչվել  է  ամենամաքուրը:

 


Ժամանցի  և կրթական  կենտրոններ

Դրախտիկում  կան ժամանցի  և կրթական բազմաթիվ կենտրոններ,  որոնց  մի  մասը  կապիտալ վերանորգման կարիք  ունի, իսկ  մյուս մասը նոր  է  ստեղծվել:

Գյուղում  կա  դպրոց,  որը, ցավոք  սրտի, 1980թ.-ից  սկսած չի  վերանորոգվել, չունի  սպորտային  դահլիճ, ունի վթարային կարգավիճակ :

Գյուղում կա  նաև  նախակրթարան, խաղահրապարակ, մատուռ, «Արմաթ» ինժեներական լաբորատորիա, որի սաները փայլուն արդյունքներ են գրանցում, «Գրադարակ» գրադարան։ Նշենք, որ այն Հայաստանում իր նմանը ունեցող երրորդ գրադարանն է եղել, որտեղ միայն ժամանակակից գրքեր են։ Գյուղում վերջին տարիներին զարգանում է զբոսաշրջությունը։ «Երազանքի գյուղ` Դրախտիկ» նախաձեռնության  թիմի շնորհիվ գյուղում բացվեցին հյուրատներ, ահա կայքը` www.drakhtikbnb.am։

Գյուղում է գտնվում նաև «Երամակ» ձիարշավարանը, որ ոչ միայն առաջարկում է ձիավարություներ, այլ կազմակերպում է նաև ձիարշավներ Արեգունի լեռնաշղթայի փեշերով՝ Սևանի գեղատեսիլ տեսարանների ուղեկցությամբ։


«Երազանքի  գյուղ» ՀԿ

«Երազանքի  գյուղ» ՀԿ-ն  ստեղծել են  21 կամավորներ: Ծրագրի մեկնարկում երիտասարդները Դրախտիկ համայնքում համատեղ ուժերով գնել են մի բնակարան, վերանորոգել, վերածել գրասենյակ-բնակարանի, ապա ծանոթացել տեղացիների հետ, ուսումնասիրել համայնքի պատմությունն ու կենսապայմանները, գրավչությունները, քայլեր ձեռնարկել համայնքի ծառապատման և կենցաղային աղբի թափոններից շրջապատը մաքուր պահելու ուղղություններում:

ՀԿ-ի ֆեյբուքյան էջը  «Երազանքի գյուղ»-ը  այսպես  է  ներկայացնում.

«Երազանքի գյուղ»-ը սոցիալական և աղքատության կրճատման ծրագիր է՝ գործարարհասարակական և այլ ոլորտների մի խումբ մարդկանց մասնավոր նախաձեռնությամբ:

Այդ պատճառով ընտրվել է բավականին սուր սոցիալտնտեսական խնդիրներով ու լքված համայնք՝ դրախտային անվանմամբբայց անգույն իրականությամբԱնհրաժեշտ է անվանումը համապատասխանեցնել իրականությանը:

Նպատակին հասնելու ճանապարհին գյուղում զբոսաշրջությանգյուղատնտեսությանինքնազբաղվածությանկրթության խթանման ծրագրեր են դրված»:

Այս  կազմակերպության շնորհիվ  Դրախտիկ  գյուղը  վերջին  տարիներին մեծ  թափով  սկսել  է  զարգանալ:  Այլ  գյուղեր  ևս  ընդգրկված  են  այս  ծրագրում,  սակայն այս  մասին  կխոսենք առանձին  հոդվածի  տեսքով:


Դրախտիկի  Վարդավառը

«Երազանքի գյուղ»  նախագծի  շնորհիվ ամեն  տարի  Դրախտիկում  անցկացվում  է  Վարդավառի  փառատոն: Ինչու՞  հենց  Վարդավառը:  Կազմակերպիչները  նշում  են. «Որտե՞ղ կարելի է նշել Վարդավառն ավելի լավ, քան Սևանա լճի ափի ու Դրախտիկի սարերում»: Փառատոնը կազմակերպվում է երկօրյա ֆորմատով։ Երկու օրվա մեջ կազմակերպվում է հանգիստ ու ժամանց «Երամակ» ձիարշավարանում, գունավոր փարթի Դրախտիկի հանրային ափում և գյուղում,  արշավ Դրախտիկի սարերում ու ծաղկահավաք այդ ընթացքում։ Նախորդ երկու տարիներին մասնակցել են  մոտ 2000 այցելուներ։ Այս  տարի  փառատոնը  անցկացվելու  է  հուլիսի 18-19-ին:



Դրախտիկի  վերաբերյալ  նյութեր  տրամադրելու  համար շնորհակալություն  կամավոր  Անդո    Սահակյանին և  Գագիկին,  ինչպես  նաև Վիքիպեդիա  Հայաստան  կայքին:  Հոդվածի  գլխավոր  նկարը  պատրաստեց  Արտյոմ  Օհանյանը: Հոդվածը  կազմեց Արմեն  Թադևոսյանը:

Ձեզ նույնպես կարող է դուր գալ