Ռոբոտացված դելֆին, որը կարող է փոխարինել իրական դելֆիններին
Կալիֆոռնիայում գործող Edge Innovations տեխնոլոգիական ընկերության երկու դիզայներ ստեղծել են իր տեսակով առաջին անիմատիկ դելֆինը՝ նպատակ ունենալով փոխարինել ծովային զվարճությունների ինդուստրիայի բոլոր անազատության մեջ գտնվող կենդանիներին: Նրանց գյուտը հարմար է «ակվարիումներում, ծովային պարկերում, թեմատիկ պարկերում, շատրվանային շոուներում, զբոսանավերում, առողջարանային հյուրանոցներում, առևտրի կենտրոններում, թանգարաններում և այլնի» օգտագործման համար:
Ռոբոտ֊դելֆիններին գործնականորեն անհնար է տարբերել իրական դելֆիններից։ Նրան կտեղավորեն չինական օվկիանարիումում։ Ռոբոտը կշռում է 270 կգ, ճշգրտորեն կրկնօրինակում է իրական դելֆինի շարժումները, ունի կմախքի և մկանների ռեալիստական կառուցվածք: Այն կարող է աշխատել մինչև 10 ժամ անընդմեջ, կախված ակտիվությունից:
Արհեստական դելֆինը ղեկավարվում է մոտակայքում գտնվող օպերատորի կողմից: Լրիվ ինքնավարության համար ռոբոտին անհրաժեշտ են միայն խցիկներ և նեյրոնային ցանցեր ուղեղի փոխարեն:
Մասնագետները ակնկալում են, որ նման ռոբոտները պահանջարկ ունենան: Նախ և առաջ լուծվում են բոլոր էթիկական հարցերը կենդանի արարածներին գերության մեջ պահելու վերաբերյալ: Երկրորդ, ռոբոտներին անհրաժեշտ չէ անասնաբույժ կամ թանկ կեր, ինչը դարձնում է նրանց պահելը ավելի էժան:
Edge Innovations-ի հիմնադիր Ուոլտ Կոնտին և դիզայներ Ռոջեր Հոլցբերգը համատեղել են կենդանի ղեկավարումը, ծրագրավորված վարքագիծը և արհեստական բանականությունը` ստեղծելու համար հիպերիրատեսական դելֆիններ, որոնք ընդօրինակում են իրական դելֆինների տեսքը, վարքն ու գործողությունները: Անիմատրոն տարբերակները ունակ են կայուն և անվտանգ եղանակով ապահովել ամբողջական կրթական փորձ` առանց գերի դելֆինների օգտագործման:
Edge Innovations-ը նպատակ ունի օգնելու ձեռնարկություններին վերանայել ծովային կենդանիների ինդուստրիայի ներուժը: Վերջին տարիներին ծովային կենդանիների որսը, տեղափոխումը և բուծումը դարձել են ավելի սահմանափակ, և SeaWorld-ի նման ընկերությունները փորձում են «մնալ ջրի երեսին»։
Վերջերս դիզայներները պարգևատրվեցին կենդանիների պաշտպանության նորարարության «Innovator for Animals Award» մրցանակով՝ «People for the Ethical Treatment of Animals» (PETA) կազմակերպության կողմից:
«Այս հեռատես դիզայներները փրկօղակ նետեցին զգայուն դելֆիններին, որոնք շահագործվում են դելֆինների հետ լողի և ծովային պարկերում շոուների համար», – ասում է PETA-ի գործադիր փոխնախագահ Թրեյսի Ռեյմանը: «PETA-ն շնորհավորում է ընկերությանը իրենց բարձր տեխնոլոգիական գյուտի կապակցությամբ, որը թույլ է տալիս մարդկանց մոտենալ դելֆիններին՝ առանց նրանց վնաս պատճառելու»:
PETA-ն ավելացնում է, որ հասարակությունը «դեմ է զվարճանքի համար կետանմաններին ազատությունից զրկելուն», համաձայն Virgin Holidays տուրիստական ընկերության հաճախորդների շրջանում անցկացված հարցման, ըստ որի, հարցվածների 92%-ը «գերադասում է կենդանիներ տեսնել իրենց բնական միջավայրում», այլ ոչ թե գերության մեջ:
