Բժշկական սելֆի
Կանադացի գիտնականները մշակել են զարկերակային ճնշումը և պուլսը չափելու նոր մեթոդ, որի համար անհաժեշտ չեն ոչ մի տեսակի հարմարանքներ բացի տեսախցիկով սմարթֆոնից: Տվյալները ստանալու համար պետք է միայն կատարել դեմքի 2 րոպեանոց վիդեո: Այնուհետեև տվյալները ներբեռնել հատուկ ծրագրով, որը ճանաչում է միջմաշկային արյան անոթները և հիմնվելով նրանցում կատարվող փոփոխությունների վրա, տալիս է հստակ տեղեկատվություն ԶՃ-ի և պուլսի մասին:
Կատարվել է հետազոտություն, որին մասնակցել են 1328 կամավոր Կանադայից և Չինաստանից: Մասնակիցները կատարել են 2 րոպեանոց սելֆի վիդեոներ և ներբեռնել են հատուկ ծրագրով` ստանալով ԶՃ-ի և պուլսի տվյալնները: Միաժամանակ միևնույն չափումները կատարել են դասական եղանակով:
Ստացված տվյալների 95%-ը համընկել են: Սակայն հեղինակները նշում են, որ ստացված տվյալները և արդյունքները բավական չեն վերջնական եզրահանգման համար: Վիդեոները կատարվել են հատուկ լուսավորությամբ, որը միշտ չէ հասանելի սմարթֆոնների օգտատերերին: Բացի այդ կամավորների մեջ չկային շատ բաց կամ մուգ մաշկով հետազոտվողներ: Եվ ևս մեկ փաստ, որ գրեթե բոլոր կամավորներն ունեին նորմալ զարկերակային ճնշում:
Ներկայումս հետազոտողները աշխատում են վիդեոսելֆիի ժամանակահատվածը կրճատելու համար` մինչև 30 վայրկյան: Նման չափումները կլինեն հասանելի բոլորին և ամենուր, ինչը հնարավորություն կտա ԶՃ-ի խնդիր ունեցողներին մշտապես գտնվել հսկողության տակ:
