Բերքահավաք՝ քիչ բերքով

Արագածոտն մարզի Կարբի համայնքում մի քանի շաբաթ է, ինչ բերքահավաք է սկսվել:

Կարբի համայնքն ապահովում է հանրապետության խնձորի բերքի առնվազն 30-40 տոկոսը:

Համայնքի բնակչությունը հիմնականում զբաղվում է իր իսկ ստեղծած այգիների մշակմամբ՝ այգեգործությամբ, մասնավորապես խնձորի մշակմամբ: Խնձորի այգիները կազմում են համայնքի պտղատու այգիների մոտ 80 տոկոսը: Խնձորի աճեցման համար բարենպաստ բնակլիմայական պայմանները, երկարատև պահպանման վերաբերյալ գիտելիքները և ավանդույթները նպաստում են որակյալ բերքի ստացմանը:

Համեմատաբար մեծ տարողունակությամբ սառնարանների առկայությունը համայնքում հնարավորություն է ստեղծում պահպանել բերքը և վաճառել ավելի բարձր գնով այն արտահանելով:

Ըստ եղանակային պայմանների, վերամշակվում և պահածոյացվում է, որոշակի մասը վաճառվում է հանրապետության շուկայում, իսկ մի մասն էլ՝ արտահանվում:

Սակայն եղանակային պայմանները ոչ միշտ են լինում բարենպաստ: Երբեմն տեղում է անձրև և կարկուտ լուրջ վնաս հասցնելով մշակված բերքին, չնայած որ տեղադրված են գործող կարկտակայաններ:

Կարբիում գործում են նաև վերամշակման երեք արտադրամասեր՝ ‹‹Թամարա ֆրուտ››, ‹‹Կարբի ֆրուտ›› և ‹‹Իշխան›› ՍՊԸ-ն, որոնք ևս ապահովում են մոտավորապես 300-350 սեզոնային աշխատատեղ:

Ընտանիքի բոլոր անդամները մասնակցում են բերքահավաքին: Դպրոցում երկու շաբաթ արձակուրդ է տրվում, որպեսզի սովորելը, դպրոցում աշխատելը և բերքահավաքը չխանգարեն մեկը մյուսին:

Քանի որ այգիները բավականին շատ են միայն ընտանիքի անդամներով աշխատելը բավականին երկար է տևում, այդ պատճառով տարբեր շրջաններից գալիս են բավականին մեծ թվով աշխատել ցանկացողներ և նրանք բոլորն էլ գտնում են աշխատանք:

Կարբի համայնքում խնձորի այգիները այս տարի ոչ այնքան առատ բերք են տվել:

«Բերքատվությունը, անցած տարվա համեմատ, ավելի ցածր է եղել: Հիմա խնձորը վաճառում եմ 70-ից մինչեւ 250 դրամ: 250 դրամով միայն լավ խնձորն է վաճառվում: Կա մարդ, որ այս տարի բերք չունի», -ասում է Կարբի համայնքի բնակիչ Արսենը:

Իսկ Լևոնը նշեց, որ արդեն մի քանի օր է՝ մեքենաներով խնձորը արտահանում են: Խնձորը գյուղացիներից գնում են 150 դրամից մինչեւ 250 դրամ: «2014թ. ես ստացել եմ 6 տոննա բերք, իսկ 2015թ.՝ 25 տոննա, բերքը լավ է եղել, մոտ 3 ամիս կպահանջվի, որ գյուղացիները իրենց բերքը վաճառեն: Վրաստանից ֆուռերը գալիս են, բերքը վերցնում, գումարն էլ տեղում վճարում են»:

Իսկ խնձորի ստացած եկամուտով մարդիկ հոգում են իրենց գրեթե ողջ տարվա հոգսերը և հնարավորության դեպքում գումար են տնտեսում, որպեսզի վաղ գարնանը սկսեն գյուղատնտեսական աշխատանքները:

 

Նյութը տրամադրեց Սվետլանա Դավթյանը։