Հայկական Startup-ները. Ձեր օրվանից` երաժշտություն
Ձեզ ենք ներկայացնոմ “Հայկական Startup-ները” խորագրի առաջին հարցազրույցը: Հարցազրույց ենք ունեցել ARD Music հավելվածի համահիմնադիր, ծրագրավորող Ռոմեո Ավագյանի հետ:
– Բարև Ձեզ: Շնորհակալություն հրավերն ընդունելու համար: Առաջին հարցը` ի՞նչ է իրենից ներկայացնում ARD Music-ը:
– Բարև Ձեզ: Ձեզ նույնպես շնորհակալ եմ հարցազրույցի հրավերի համար: Անցնենք հարցին:
ARD Music հավելվածը հնարավորություն է տալիս ձեր օրը դարձնել երաժշտություն: Ի դեպ` ARB չէ, ARC չէ, հենց` ARD, որը նշանակում է արհեստական զարգացում: Այն աշխատում է մի քանի AI-ների միջոցով: AI-ը վերցնում է օրվա ընթացքում ձեր քայլերի, ծախսած կալորիաների քանակը և այն, ինչը վերաբերվում է օրվա ընթացքում ձեր ֆիզիկական ակտիվությանը, փոխանցում մեկ այլ` գլխավոր AI-ին, որը գեներացնում է այն: Այս AI-ը պատասխանատու է նաև հարմոնիաների, նոտաների կոմբինացիաների համար:
– Ինչպե՞ս առաջացավ ձեր գաղափարը և ինչպե՞ս ձևավորվեց թիմը:
– Մոտ երկու տարի առաջ ակումբում նստած էի: Բոլորիս համար էլ սովորական է, որ ձայնի արդյունքում գեներացվում է պարը, շարժումները: Բայց ինձ մոտ հարց առաջացավ` ինչու՞ չի կարող շարժումներից գեներացվել ձայնը, այսինքն` հակառակը: Մի քանի օր այդ գաղափարը մտքիցս դուրս չէր գալիս: Թիմ հավքեցի և սկսեցինք աշխատել: Այդ թիմով ձախողվեցինք, որովհետև միայն ես էի փորձառու ծրագրավորող: Այդ պատճառով ես սկսեցի միայնակ աշխատել: Մի օր, երբ պատմեցի ընկերոջս` Մկրտչին իմ գաղափարի մասին, պարզեցի, որ նա նաև երաժիշտ է: Սկսեցինք աշխատել: Զգացինք, որ հեռախոսի համար նախատեսված հավելված է անհրաժեշտ: Մտանք LinkedIn, գտանք հայ անդրոիդ ծրագրավորողների, կապնվեցինք նրանց հետ: Պատասխանեց Զառան, հանդիպեցինք, համաձայնվեց: Հետագայում մեզ միացավ նաև դիզայներ Նելլին` կինս, ով հանդիսանում է նաև համահիմնադիր:
– Ի՞նչ երաժշտական գործիքներ եք օգտագործում ծրագրում:
– Ծրագրում օգտագործվում են 100-ին մոտ երաժշտական գործիքներ: Նախատեսվում է ավելացնել նաև հայկականը: Բայց չգիտենք` հայկական գործիքները վճարովի է լինելու, թե ոչ:
– Ինչպե՞ս տարածվեց Ձեր ծրագիրը:
– Մինչև դա ներկայացնելը, ասեմ, որ մենք շատ վատ ստարտափ ենք, որովհետև հերթով մենք քանդեցինք ստարտափի բոլոր օրենքները: Ստարտափ ստեղծելիս հաշվի են առնում, թե ինչ խնդիր պիտի լուծեն, հետո նոր ստեղծում են: Իսկ մենք ստեղծեցինք, հետո սկսեցինք մտածել, թե ի՞նչ խնդիր է այն լուծում: Իհարկե սա հումոր: Մեր ծրագիրը օգնում է շփվելիս և ինչ-որ օր ավելի հիշարժան դարձնելիս: Հիմա անցնեմ հարցին:
Գերմանիայում կա մի խումբ, որ կոչվում է ARD Music Compotition, որտեղ վիճում են , թե ով է ավելի լավ երաժիշտ: Մի ժամանակ մեր էջը գուգլում իրենցինից առաջ ընկավ, ու մենք շատ օգտատերեր ունեցանք: Ապա օգտագործեցին նաև Հայաստանում:
– Ի՞նչ միջոցառումների է մասնակցել ձեր ստարտափը:
– Առաջին տարին, երբ դեռ գաղափար էր, մասնակցեցինք Startup Boost Weekend-ին: Այդ ժամանակ մեզ ոչ ոք չէր հավատում, դե արհեստական բանականությունը դեռ չէր զարգացել: Հաջորդ տարի, երբ ծրագիրը արդեն պատրաստ էր, մասնակցեցինք և 500 եվրո հաղթեցինք: Մասնակցել ենք նաև DigiTec Expo 2019-ին, WCIT 2019-ին, Եվրոպայի օրվան և այլն:
– Ի՞նչ խնդիրներ ունեք:
– Ընդհանուր ստարտափը ունի ֆինանսավորման խնդիր: Իսկ պրոդուկտը ունի դիզայնի և նոր ֆունկցիաներ ավելացնելու խնդիր: Դիզայնի հետ կապված նշեմ, որ այն լիքը փոփոխություններ է կրել և դեռ էլի կկրի: Իսկ նոր ֆունկցիաների առումով ասեմ, որ ցանկանում ենք հնարավորինս հարմարավետ պայմաններ ստեղծել մեր օգտատերերի համար:
– Եվ վերջում` ի՞նչ կասեք Հայաստանում IT ոլորտի մասին:
– Հայաստանում IT-ն զարգանում է մեծ արագությամբ: Սակայն խնդիրը նրանում է, որ մասնագետները այդ աճը ուշ են նկատել: Պահանջարկը այժմ մեծ է, ինչը բավականին դրական ազդեցություն ունի: Հատկապես ոգևորիչ և մոտիվացնող է համաշխարհային ճանաչման հայ ստարտափները, օրինակ PicsArt-ը:
– Շնորհակալություն հարցազրույցի համար:
– Ձեզ նույնպես:
Հիշեցնենք, որ ARD Music-ը հայկական գերժամանակակից հավելված է, որը հնարավորությւոն է տալիս ձեր օրը դարձնել երաժշտություն: Այն առկա է Play Market-ում:
