Գյումրիում նախատեսվում է կառուցել 500 միլիոն դոլար արժողությամբ օդային քաղաքային տրանսպորտային համակարգ
Գյումրիի քաղաքապետարանում անցկացվել է հանրային բաց լսում – քննարկում, որի ընթացքում մասնակիցներին ներկայացվեց քաղաքում «Սքայ Գյումրի» ծրագրի իրագործման միջոցով օդային քաղաքային տրանսպորտային համակարգի ստեղծման նախագիծը:Այն իրականացնելու է «Արմոն» սահմանափակ պատասխանատվությամբ ընկերությունը:Խաչատուր Սարգսյանը, ով հանդիսանում է ընկերության տնօրենը, հանրային լսման ընթացքում ներկայացրել է շատերի համար հավակնոտ ծրագիրը, հավելելով , որ այն Գյումրիում ներկայացնելու պատճառներից մեկն էլ իր գյումրեցի լինելն և ՀՀ-ում զբոսաշրջային ակտիվ քաղաք լինելու հանգամանքը։
Ծրագրի ընդհանուր արժեքը գնահատվել է 500 միլիոն դոլար։Ծրագրի շրջանակներում նախատեսվում է քաղաքի ողջ երկայնքով անցկացնել ժամանակակից ճոպանուղի, որը կունենա մոտ 14 կանգառ ու կայանատեղի, որտեղ կկառուցվեն ժամանցային վայրեր, սպորտային համալիր, սրճարաններ ու հանգստի համար նախատեսված գոտիներ:Օդային տրանսպորտը սկիզբ կառնի Շիրակ օդանավակայանից, կշրջի քաղաքի պատմական ու հին մասերով, կանցնի գրեթե բոլոր թաղամասերով ու կրկին շրջանաձև ընթացքով կվերադառնա հետ։ Տրանսպորտը կաշխատի նորագույն տեխնոլոգիայով, վարորդներ ու հսկիչներ չեն լինելու:
Վարձավճարը տեղացիների ու զբոսաշրջիկների համար կլինեն տարբերակված. գյումրեցիները կունենան զեղչից օգտվելու հնարավորություն։Օդային տրանսպորտային համակարգի շինարարությունը նախատեսվում է ավարտին հասցնել 2023 թվականին, ցեմենտբետոնյա տարրեր չեն օգտագործվելու, ենթակառուցվածքները կլինեն մոդուլային՝ մետաղապլաստե կոնստրուկցիաներով կառուցված։ Նախատեվում է ծրագրի շրջանակում վերակառուցել ու զբոսաշրջային կենտրոններ դարձնել նաև քաղաքի պատմական հուշարձաններն ու չգործող շատրվանները։
