5 պարտադիր դիտելու սերիալներ
2020 թվականը մեծ հետք թողեց ոչ միայն պետությունների տնտեսության, զբոսաշրջության, կրթության վրա, այլ նաև մարդկանց հոգեբանության, ապրելակերպի ու անհատի զարգացման, ինչու ոչ նաև ձևավորման վրա: Չկենտրոնանալով բացասական ազդեցության վրա՝ պետք է ընդունենք, որ կորոնավիրուսի և մեկուսացման պատճառով կամ շնորհիվ շատերս սկսեցինք ավելի շատ ժամանակ տրամադրել մեր անձին, շարունակեցինք կարդալ կիսատ թողած գրքերը, վերանայեցինք վաղուց մոռացված ֆիլմերը, բացահայտեցինք նորերը, մեկ օրում վերջացրինք բազմասերիանանոց ֆիլմեր ու ինքնակրթվեցինք, ինքնազարգացանք, բացահայտեցինք մեզ յուրովի: Այս օրերին ինձ համար բացահայտեցի, որ նախընտրում եմ սերիալներ դիտել, կապվել հերոսների հետ, երկար մտածել նրանց ճակատագրի մասին, խճճվել ու վերջում համաձայնել կամ բռնկվել սցենարիստների տված վերջաբաններից: Ինչպես հասկացաք, ձեզ եմ ներկայացնում 5 սերիալներ, որոնք կփոխեն ձեզ, կմտնեն ձեր կյանք ու որոնցով կսկսեք ապրել:
- Ընկերներ/Friends
Սերիալի յուրաքանչյուր գուրու տեսել կամ գոնե լսել է այս կատակերգության մասին, որը իր ժանրում հանճարեղ ու անփոխարինելի է: Վեց մոտ ընկերներ, սեր, հարաբերություններ, փորձություններ, և այս ամենը ուղղորդվում է կատակներով, հայտնի դարձած արտահայտություններով ու, դե իհարկե, անբացատրելի կերպով ճիշտ ընտրված դերասանական կազմով ու փայլուն խաղով: Այն շրջանում, երբ հեռու ես ընկերներիցդ, կարոտում ես նրանց հետ անցկացրած ժամանակը, այս սերիալը կլրացնի այդ բացը ու 10 եթերաշրջան կապահովի ծիծաղ: Սեր, ընկերություն ու պարզապես ուրախ կյանք։ Ընկերները կմտնեն քո կյանք ու կուղեկցեն քեզ միշտ, բառիս բուն իմաստով միշտ, որովհետև նրանց մոռանալն ու նրանցից բաժանվելը անհնար է:
- Խավար/ Dark
Միշտ սիրել եմ Գերմանիան ու գերմանացիներին, բայց գերմանական այս սերիալից հետո ես պարզապես սիրահարվեցի այդ ազգին պատկանող ամեն ինչին: Կատարելություն բառը ստեղծվել է այս սերիալը նկարագրելու համար: Սերիալի ողջ ընթացքում դու մտածում ես, վերանայում ես քեզ, քո կյանքը, անցյալդ ու ապագադ: Սերիալը խճճում է միտքդ ու ներսդ, հայտնվում ես խավարում ու էնտեղից դուրս գալու համար հնարավոր է պետք լինի սերիալը վերանայել: Այս գիտաֆանտաստիկ թրիլեր-դրաման իսկական սերիալասերների համար է: Ապշեցնող դերասանական կազմ, վիզուալ էֆեկտներ, սցենար, դե իսկ երաժշտությունն ամեն եթերաշրջանի հետ (որոնք երեքն են) առաջնակարգ տեղ կզբաղեցնի ձեր երգադարանում:
- Ինչպես խուսափել սպանության համար պատժից/ How to get away with murder
Սպանություններ, խճճված զարգացումներ, իրավաբան սևամորթ կին, ով պետք է պայքարի իր անձի ու դիմացինների համար: Վեց եթերաշրջանից կազմված դետեկտիվ ժանրի այս սերիալը ձեզ չի թողնի հանգիստ քնել կամ մտածել մեկ այլ բանի մասին: Դուք սիրահարվում եք գլխավոր կերպարին՝ Անալիզ Քիթինգին, իրավաբան կնոջ, ով գիտի ուժեղ լինել, պայքարել մինչև վերջ ու տալ զոհեր իր ճանապարհին: Ուժեղ կնոջ կերպար, որից կարելի է սովորել, և իր ուսանողները, որոնք բացահայտում են նոր քրեական դեպքեր, ու իրենք էլ հայտնվում խնդիրների մեջ կամ դառնում խնդիրների պատճառ: Դետեկտիվ, թրիլեր ժանրի սիրահարները բարձր կգնահատեն այս սերիալը:
- Շերլոկ/Sherlock
Բոլորս էլ լսել կամ կարդացել ենք Արթուր Կոնան Դոյլի հեղինակած այս առեխծվածային կերպարի մասին, ով իր ժամանակակից լուծումն է ստացել հոյակապ Բենեդիկտ Կամբերբատչի կողմից: Շերլոկ Հոլմսը և իր հավատարիմ ընկեր պարոն Ուաթսոնը բացահայտում ու հանգուցալուծում են առեղծվածային պատահարներ ու թույլ տալիս, որ մի պահ մենք էլ աշխատեցնենք մեր վերլուծական մտածողությունը ու փորձենք նրանց հետ միասին բացահայտել դեպքերը: Հետաքրքիր սյուժե, կերպարներ ու դերասանական խաղ: Յուրաքանչյուր սերիալասերի “must watch” ցանկում պետք է լինի հինգ եթերաշրջանից բաղկացած բրիտանական այս հեռուստանովելը:
- Թղթե տունը/ La casa de papel
Իսպանիայի դրամահատարանի կողոպուտի մասին պատմող իսպանական այս դրաման շատ սիրվեց ոչ միայն իր հայրենիքում, այլև հասավ մինչև Հայաստան ու հայկական թարգմանություն: Առաջին երկու եթերաշրջանները կստիպեն ձեզ սիրահարվել այս սերիալին, կերպարներին ու կողոպուտի իդեալական գաղափարին, կարծում եմ մյուս երկու եթերաշրջանները զիջում են առաջին երկուսին, բայց, այնուամենայնիվ, դրանք ևս լարված են պահում դիտողին, գամում էկրանին ու ստիպում, որ անհանգստանաս սիրածդ հերոսների համար ու, ինչու ոչ, հուզվես: Ֆիլմի վերջին՝ հինգերորդ եթերաշրջանը հաստատված է Նեթֆլիքսի կողմից, ու մեզ միայն մնում է սպասել և տեսնել, թե ինչպես են ավարտվում արդեն սիրելի դարձած կողոպտիչների ճակատագրերը: Իսկ եթե դեռ չես դիտել այս սերիալը ու հենց նոր ցանկություն առաջացավ դիտելու, ապա քեզ խորհուրդ՝ դիտիր ռուսերեն կամ անգլերեն տարբերակը, հայկականից հնարավոր է հիասթափվես :
