Հունիսի 1-ը ` Երեխաների պաշտպանության միջազգային օր
Տարիներ շարունակ ամռան առաջին օրը՝ հունիսի 1-ը բազմաթիվ երկրներում նշվում է որպես Երեխաների պաշտպանության միջազգային օր: Սա ամենահին տոներից մեկն է, որի հիմնադրման մասին որոշումը կայացվել է Ժնևում 1925 թվականին՝ երեխաների բարեկեցության հարցերին նվիրված համաշխարհային համաժողովի ժամանակ:
1949-ին Կանանց ժողովրդավարական միջազգային դաշինքը երեխաների պաշտպանության օր անցկացնելու որոշում է ընդունել:Առաջին անգամ հունիսի 1-ը նշվել է որպես երեխաների պաշտպանության միջազգային օր 1950թ-ին:
Հստակ տվյալներ չկան, թե ինչու է հենց հունիսի 1-ն ընտրվել որպես երեխաների պաշտպանության միջազգային օր, սակայն կա մի վարկած, համաձայն որի հունիսի 1-ը չինական-ամերիկյան ծագում ունի և որևէ առնչություն չունի կոմունիզմի հետ: 1925 թվականի հունիսի 1-ին Չինաստանի Գլխավոր հյուպատոսը Սան Ֆրանցիսկոյում հավաքել էր չինացի ծնողազուրկ երեխաներին և նրանց համար կազմակերպել Դուան-ու ցզե տոնը, ու քանի որ այդ օրը համընկել է Ժնևում երեխաների բարեկեցության հարցերին նվիրված համաշխարհային համաժողովի հետ, ընտրվել է հենց հունիսի 1-ը:
Հայաստանը Երեխաների իրավունքների մասին կոնվենցիան վավերացրել է 1990 թվականին, 1996 թվականին ընդունվել է «Երեխայի իրավունքների մասին» ՀՀ օրենքը։
Իսկ Միացյալ Նահանգներում երեխաների պաշտպանության միջազգային օրը նշվում է հունիսի երկրորդ կիրակի օրը, այս տարի` հունիսի 13-ին, Ճապոնիայում, Չինաստանում, Տայվանում, Հոնկոնգում, Կորեայում, Վիետնամում` մայիսի 5-ին, Հնդկաստանում` նոյեմբերի 14-ին:
Ամեն տարի այս օրը երեխաների համար կազմակերպվում են տարբեր սպորտային մրցույթներ, համերգներ, կավճանկարչություն, ինչպես նաև հետաքրքիր խաղեր:Սակայն այս տարի COVID-19 համավարակի պատճառով ավանդական միջոցառումները փոխարինվել են օնլայն համերգներով:
